На ўсёй тэрыторыі Брэсцкай і Магілёўскай абласцей нельга свабодна наведваць лясы

17 жніўня, Позірк. На ўсёй тэрыторыі Брэсцкай і Магілёўскай абласцей нельга свабодна наведваць лясы, сведчыць інтэрактыўная карта Міністэрства лясной гаспадаркі на дзень 17 жніўня.

У пяці раёнах на паўднёвым захадзе Брэсцкай вобласці — Брэсцкім, Жабінкаўскім, Камянецкім, Кобрынскім і Маларыцкім — працягвае дзейнічаць уведзеная 13 жніўня забарона на наведванне лясоў.

На астатняй тэрыторыі абмежаванні: у лясы нельга на аўтамабілях, не дазваляецца разводзіць там вогнішчы.

У Гродзенскай вобласці толькі лясы Астравецкага і Ашмянскага раёнаў адкрытыя для свабоднага наведвання, на астатняй тэрыторыі — абмежаванні.

У Мінскай вобласці няма абмежаванняў у чатырох раёнах: Валожынскім, Копыльскім, Любанскім і Мядзельскім. Столькі ж раёнаў адкрыта для свабоднага наведвання лясоў у Гомельскай вобласці (Акцябрскі, Жлобінскі, Жыткавіцкі, Светлагорскі).

Лясы Віцебскай вобласці можа наведваць без абмежаванняў, за выключэннем шасці раёнаў на паўднёвым усходзе (Аршанскі, Бешанковіцкі, Дубровенскі, Сенненскі, Талачынскі, Чашніцкі).

Яшчэ раніцай 17 жніўня свабодна наведваць лясы можна было толькі на поўначы Беларусі: у Браслаўскім, Верхнядзвінскім, Мёрскім, Пастаўскім і Шаркаўшчынскім раёнах Віцебскай вобласці і Мядзельскім раёне Мінскай вобласці. Аднак неўзабаве абмежаванні былі часткова знятыя пасля дажджоў, якія прайшлі ў мінулыя суткі.

Днём 17 жніўня Белгідрамет прагназуе месцамі дажджы, па поўначы — у многіх раёнах, ноччу 18 жніўня — месцамі дажджы, днём 18 жніўня і на працягу сутак 19 жніўня — пераважна без ападкаў. 20 жніўня ноччу месцамі па поўначы, днём на большай частцы тэрыторыі пройдуць дажджы.

За чэрвень і ліпень у краіне выпала амаль уся летняя норма ападкаў.