За сем месяцаў аб’ём грузаперавозак знізіўся на 3,8%
18 жніўня, Позірк. Аб’ём грузаперавозак у студзені — ліпені 2025 года знізіўся на 3,8% (тут і далей у гадавым выражэнні), паведамляе Нацыянальны статыстычны камітэт.
На працягу апошніх пяці месяцаў 2024 года назіралася памяншэнне росту ў гэтым сегменце транспартнай галіны: па выніках студзеня — жніўня аб’ём вырас на 3,8%, студзеня — верасня — на 2,8%, студзеня — кастрычніка — на 2,3%, студзеня — лістапада — на 1,9%, студзеня — снежня — на 1,5%.
У 2025 годзе аб’ём грузаперавозак зніжаецца: у студзені — на 1,6%, студзені — лютым і студзені — сакавіку — на 2,7%, студзені — красавіку — на 3%, студзені — траўні — на 3,4%, студзені — чэрвені — на 3,6%.
Пасажыраабарот транспарту (вылічаецца шляхам множання колькасці пасажыраў на адлегласць перавозак) вырас за сем месяцаў на 6,5% (па выніках студзеня — чэрвеня — 6,7%, студзеня — траўня — 6,8%), перавезена на 1,9% больш пасажыраў (+1,8% і +1,5% адпаведна).
У Беларусі грузаабарот транспарту памяншаўся: у 2019 годзе — на 5,8%, 2020‑м — на 5,9%, 2021‑м — на 3,6%, 2022‑м — на 25,4%, 2023‑м — на 17,7%.
Раней аналітыкі Еўразійскага банка развіцця патлумачылі значнае скарачэнне грузаабароту ў Беларусі “парушэннем транспартна-лагістычных ланцужкоў, закрыццём паўднёвай часткі паветранай прасторы Расіі, спыненнем перавозак у зносінах з Украінай”.
Па выніках студзеня — чэрвеня 2025 года па паказчыках пасажыра- і грузаперавозак Беларусь у Еўразійскім эканамічным саюзе знаходзілася на другім (+6,7%) і пятым (-3,6%) месцах адпаведна.
