За суткі ад агню сканалі тры пенсіянеры, з пачатку года колькасць ахвяр пажараў перавысіла 350

20 жніўня, Позірк. Тры чалавекі сканалі ў Беларусі ад агню за мінулыя дзяжурныя суткі, вынікае з аператыўнай зводкі Міністэрства па надзвычайных сітуацыях (з 6:00 19 жніўня да 6:00 20-га).

Усе ахвяры — пенсіянеры.

Жанчына 1951 года нараджэння загінула ад агню ў жылым доме ў вёсцы Седзіч Быхаўскага раёна (Магілёўская вобласць).

Мужчына 1947 г.н. стаў ахвярай пажару ў Горках (Магілёўская вобласць). Там таксама загарэўся жылы дом.

Ад апёкаў, атрыманых 5 жніўня на пажары ў жылым доме ў вёсцы Новая Цемра Драгічынскага раёна (Брэсцкая вобласць), ва ўстанове аховы здароўя памёр грамадзянін 1960 г.н.

Паводле афіцыйных даных МНС, з пачатку года здарылася 4.304 пажары (годам раней — 3.756; +14,6%), загінула 352 чалавекі (318; +10,7%).

Пры гэтым, як раней адзначаў “Позірк”, МНС маніпулюе данымі аб смяротнасці на пажарах.