Пасля вылету з Варшавы ў Стамбул перастаў выходзіць на сувязь прадстаўнік фонду спартыўнай салідарнасці Котаў
25 жніўня, Позірк. Пра страту сувязі з прадстаўніком Беларускага фонду спартыўнай салідарнасці (БФСС) Анатолем Котавым паведаміў на сваёй старонцы ў “Фэйсбуку” 25 жніўня кіраўнік арганізацыі Аляксандр Апейкін.
“У чацвер раніцай, 21 жніўня, наш калега Анатоль Котаў вылецеў з Варшавы ў Стамбул па асабістых пытаннях. Увесь дзень быў на сувязі з роднымі і калегамі. У чацвер пасля 21:30 па польскім часе перастаў выходзіць на сувязь. З таго моманту на сувязь больш не выходзіў”, — адзначыў Апейкін.
Паводле яго слоў, родныя Котава “падалі заяву ў турэцкую паліцыю і консульства Польшчы ў Стамбуле”.
“Гэта адзіная дакладная інфармацыя. Любая іншая інфармацыя не адпавядае рэчаіснасці і з’яўляецца здагадкай”, — падкрэсліў кіраўнік фонду.
Раней аб знікненні Котава паведамілі выданні reform.news і “Наша Ніва”. Выказваліся здагадкі, што ён мог быць затрыманы ў Турцыі.
Тэлефон Котава цяпер недаступны. Пры спробе “Позірку” звязацца з ім адбываецца пераключэнне ў рэжым “абаненцкай скрыні”.
Котаў — былы супрацоўнік адміністрацыі Аляксандра Лукашэнкі і Упраўлення справамі прэзідэнта, былы генеральны сакратар Нацыянальнага алімпійскага камітэта, дыпламат з досведам працы ў Міністэрстве замежных спраў.
У 2020 годзе пакінуў дзяржслужбу, падтрымаў масавыя пратэсты і далучыўся да БФСС. Неўзабаве пасля гэтага эміграваў у Польшчу.
У ліпені 2024 года завочна прыгавораны ў Беларусі да 12 гадоў пазбаўлення волі як удзельнік “экстрэмісцкага фарміравання “Форум дэмакратычных сіл Беларусі”.
Беларускі фонд спартыўнай салідарнасці быў заснаваны спартыўнымі функцыянерамі і атлетамі ў адказ на падзеі пасля прэзідэнцкіх выбараў 2020 года. Займаецца падтрымкай спартсменаў, якія падвергліся пераследу, і абаронай іх правоў. Прызнаны “экстрэмісцкім фарміраваннем”.
Гл. таксама:
Спікер КР Мельнікава магла быць завербаваная вайсковай выведкай Беларусі — СМІ (дапоўнена)
