26 жніўня, Позірк. Пра пахаванне ва Украіне загінулага беларускага добраахвотніка з пазыўным “Месяц” паведаміў 26 жніўня полк Каліноўскага.
Адзначаецца, што загінулы некалькі месяцаў таму перавёўся ў 13-ю брыгаду аператыўнага прызначэння Нацыянальнай гвардыі Украіны “Хартыя”, але “па-ранейшаму лічыў сябе часткай вялікай сям’і палка імя Кастуся Каліноўскага”.
Ён загінуў 19 жніўня падчас выканання баявога задання.
У мужчыны засталіся жонка і нованароджанае дзіця. Для іх абвешчаны дабрачынны збор.
Пра гібель добраахвотніка паведаміла напярэдадні аб’яднанне ўкраінскіх анархістаў “Колективи Солідарності”. Падкрэслівалася, што ў Беларусі ён удзельнічаў у акцыях пратэсту, “быў неаднаразова рэпрэсаваны за сваю пазіцыю”. З 2023 года ваяваў у складзе УСУ — спачатку ў якасці баявога медыка, пазней — у роце агнявой падтрымкі і сапёрным падраздзяленні. У 2024 годзе быў пераведзены ў мінамётнае падраздзяленне.
Паводле звестак СМІ, з пачатку поўнамаштабнай вайны ў баях супраць Расіі загінула не менш за 65 беларускіх добраахвотнікаў.
