Адкрыты рэгулярны аўтобусны рэйс з Гродна ў Вільнюс

28 жніўня, Позірк. Аб адкрыцці з 27 жніўня новага рэгулярнага рэйса ў Вільнюя паведаміла гродзенскае трансагенцтва “Фаварыт”.

Згодна з раскладам, аўтобус адпраўляецца з Гродна ў 03:00, праходзіць праз Ліду, Шальчынінкай і аэрапорт Вільнюса і прыбывае на аўтавакзал сталіцы Літвы ў 08:25.

Назад у Гродна рэйс адпраўляецца ў 18:25, час прыбыцця — 23:50.

Раней аператар міжнародных пасажыраперавозак Eurolines абвясціў аб канчатковай адмене дзесяці парных рэйсаў паміж Вільнюсам і Мінскам. 13 жніўня стала вядома, што перавозчык пачаў выкарыстоўваць на трох астатніх рэйсах двухпавярховыя аўтобусы.

Eurolines удакладніў, што будзе выконваць рэйсы са сталіцы Літвы ў 06:40, 09:00, 13:00, са сталіцы Беларусі — у 14:20, 16:00 і 20:00.

Партал Delfi са спасылкай на Міністэрства транспарту Літвы праінфармаваў, што скасаванне шэрагу рэйсаў паміж Вільнюсам і Мінскам з 12 жніўня звязанае з тым, што колькасць аўтобусаў, якія перасякаюць мяжу, перавышала ўстаноўлены ліміт і перавозчыкі атрымалі адпаведнае папярэджанне.

Раней беларускі перавозчык “Мінсктранс” паведаміў, што з 14 жніўня да “атрымання неабходных дазвольных дакументаў” прыпыняе выкананне рэйсаў з Мінска ў 01:50, 10:20, 12:00, з Вільнюса — у 08:00, 17:30, 18:00.

У студзені 2024 года Адміністрацыя транспартнай бяспекі Літвы (АТБЛ) паведаміла, што пасля праверкі ў Вільнюсе двух пасажырскіх аўтобусаў, зарэгістраваных у Беларусі, была выяўленая адсутнасць у кіроўцаў неабходных дазволаў на паездку. Пасажыры аднаго з аўтобусаў былі высаджаныя, ім давялося самастойна дабірацца да мясцовага аўтавакзала, на кіроўцу быў складзены пратакол аб адміністрацыйным правапарушэнні і накладзены штраф у памеры 2.500 еўра.

Паводле інфармацыі ведамства на той момант, з ліпеня 2023 года АТБЛ праверыла 47 зарэгістраваных у Беларусі аўтобусаў, якія ажыццяўлялі рэгулярныя і чартарныя пасажырскія перавозкі паміж Беларуссю і Літвой. “Пасля праверак амаль ва ўсіх аўтобусах зафіксаваныя парушэнні. У 24 выпадках кампаніі-перавозчыкі не мелі дазволу на праезд. У 25 былі выяўленыя парушэнні рэжыму кіравання і адпачынку”, — гаварылася ў рэлізе.

Паводле слоў дырэктара АТБЛ Генюса Лукошуса, беларускія перавозчыкі “маніпулююць відамі пасажырскіх перавозак“, што з’яўляецца “грубым парушэннем” пагаднення паміж урадамі Літвы і Беларусі аб міжнародных аўтамабільных перавозках ад 30 чэрвеня 1993 года.

“Рэйс афармляецца як чартарны, але пры праверцы аказваецца, што гэта рэгулярнае паведамленне, што з’яўляецца парушэннем. Таксама <…> група людзей афармляецца як экскурсія, але назад у Беларусь вяртаецца толькі частка пасажыраў“, — заявіў Лукошус.

30 красавіка паведамлялася, што МЗС Літвы “на гэты момант не бачыць перадумоў і падстаў для аднаўлення пасажырскіх чыгуначных зносін“ з Беларуссю.

28 красавіка тагачасны прэм’ер-міністр Літвы Гінтаўтас Палуцкас заявіў, што Вільнюс не будзе спяшацца з адказам на прапанову Мінска аднавіць пасажырскія чыгуначныя зносіны. Гэтую прапанову, паводле яго слоў, разглядаюць “у кантэксце ўсіх санкцый, вайны ва Украіне і стасункаў Еўрасаюза з Расіяй”.

Пра тое, што Беларуская чыгунка прапанавала Польшчы, Літве і Латвіі аднавіць прамыя пасажырскія перавозкі, прэс-служба БЧ паведаміла 21 красавіка.

Пасажырскія чыгуначныя зносіны Беларусі з Літвой, Польшчай і Латвіяй былі прыпыненыя ў 2020 годзе з-за пандэміі COVID-19, пасля так і не аднавіліся.

У 2019 годзе на гэтыя кірункі прыпадала каля 20% усіх міжнародных перавозак па чыгунцы. У Літву было перавезена 380 тыс. пасажыраў, Польшчу — 225 тыс., Латвію — 20 тыс.