29 жніўня, Позірк. Міністэрства ўнутраных спраў дадало ў спіс “асоб, якія маюць дачыненне да экстрэмісцкай дзейнасці”, яшчэ 14 чалавек. Цяпер у дакуменце, размешчаным на сайце ведамства, 5.677 пазіцый.
Сярод уключаных у спіс — палітвязень Андрэй Бесаў, які адбывае пакаранне. Паводле даных праваабаронцаў, ён асуджаны паводле ч. 3 арт. 361 (заклікі да мераў абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь) і ч. 1 арт. 130 (распальванне расавай, нацыянальнай, рэлігійнай або іншай сацыяльнай варожасці або варожасці) Крымінальнага кодэкса да чатырох гадоў пазбаўлення волі.
Каля прозвішчаў астатніх 13 чалавек, уключаных у спіс, стаіць пазнака “судзімасць не пагашана”. Як правіла, гэта азначае прызначэнне пакарання, не звязанага з абмежаваннем ці пазбаўленнем волі.
Усе яны асуджаныя паводле ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх). Гэта Віктар і Вольга Мінаковы, Андрэй Мякчыла, Раман Неваш, Антон Красоўскі, Юлія Ляшук, Філіп Аўгусціновіч, Крысціна Раманоўская, Таццяна Шарах, Кацярына Явід, Максім Япушэнка, Юлія Лынава і Арцём Багданаў.
Уключэнне асуджаных у спіс “экстрэмістаў” — адзін з механізмаў масавых палітычных рэпрэсій, якія працягваюцца ў Беларусі з 2020 года.
Аўтарызавацца
Забыліся пароль?
Выхад з профілю
