Кіраўнік МЗС Літвы не бачыць прычын для перагляду палітыкі ў дачыненні да афіцыйнага Мінска

Апублікавана на адкрытай версіі “Позірку” 12 верасня 2025 года ў 09:49

11 верасня, Позірк. Першарадная цікавасць Літвы ў плане Беларусі зараз заключаецца ў тым, каб па суседстве была суверэнная і незалежная краіна, з якой можна мірна існаваць, заявіў літоўскі міністр замежных спраў Кястуціс Будрыс 11 верасня ў Вільнюсе.

Чыноўнік выказаўся на гэты конт на канферэнцыі “Беларусь і беларусы ў часы геапалітычнай нестабільнасці: глабальныя ўспрыманні і ўнутраныя рэаліі”.

“Іншае пытанне — якімі інструментамі мы карыстаемся, каб дасягнуць рэалізацыі гэтых інтарэсаў, — адзначыў ён. — Тое, што мы бачылі за апошнія 30 гадоў нашых адносін з Беларуссю пры Лукашэнку, — гэта пастаянная гульня з нашымі інструментамі. Уводзіце санкцыі — добра, здымайце іх, і тады мы кагосьці вызвалім”.

“У нашым выпадку ўрок, які мы вынеслі, заключаецца ў тым, што мы павінны быць паслядоўнымі. Мы не павінны кідацца і губляць палітычную ініцыятыву ў гэтых рашэннях. Ёсць канкрэтныя прычыны, з якіх мы ўвялі санкцыі супраць Беларусі. Гэта сфальсіфікаваныя выбары 2020 года і ўсё, што было зроблена з людзьмі, якія пратэставалі, дапамога Расіі ў агрэсіі, дапамога Расіі ў агрэсіі, дапамогу Расіі ў агрэсіі, выкарыстанне мігрантаў у якасці зброі“, — канстатаваў Будрыс.

Такім чынам, паводле яго слоў, існуе “доўгі спіс прычын, па якіх былі ўведзены абмежавальныя меры”, і для таго, каб Вільнюс змяніў сваю пазіцыю, “трэба ліквідаваць карэнныя прычыны”.

“І зараз мы бачым спробы рэжыму паўплываць на гэтыя рашэнні. Для мяне гэта доказ таго, што санкцыі эфектыўныя і павінны заставацца ў сіле”, — падкрэсліў чыноўнік.

Кіраўнік літоўскай дыпламатыі лічыць, што “змякчэнне міжнароднай ізаляцыі Лукашэнкі, абмеркаванне абмену палітычных зняволеных на скасаванне санкцый“ — гэта “вельмі небяспечны шлях. Думаю, гэта можа прывесці да сітуацыі, калі Лукашэнка прынамсі будзе зноў і зноў набіраць закладнікаў. <…> Мы павінны патрабаваць вызвалення абсалютна ўсіх палітвязняў, <…> гэта павінна стаць адпраўным пунктам для любых дыскусій“.

“Мы павінны быць паслядоўнымі і цярплівымі ў выкарыстанні тых інструментаў, якія мы ўжываем. Таму цяпер я не бачу ніякіх падстаў для перагляду [палітыкі ў дачыненні да афіцыйнага Мінска]”, — заявіў Будрыс.