Кіраўнік МЗС Венгрыі на БТ: Санкцыі нашкодзілі больш Еўропе, чым Беларусі і РФ

11 верасня, Позірк. Еўрапейскія санкцыі ў дачыненні да Беларусі і РФ “не працуюць“, заявіў у інтэрв’ю тэлеканалу “Беларусь 1“ міністр замежных спраў Венгрыі Петар Сіярта.

“Мы (Еўрапейскі саюз. — “Позірк”.) ужо прынялі 18 пакетаў санкцый [супраць РФ], і яны нашкодзілі больш Еўропе і еўрапейскай эканоміцы, чым Беларусі ці Расіі. Гэта відавочна. Нават сярод маіх калег-міністраў у Еўропе існуе меркаванне, што санкцыі не працуюць так, як задумвалася“, — сказаў венгерскі чыноўнік.

Паводле яго слоў, калі нешта робіцца 18 разоў запар і гэта не працуе, то, “напэўна, гэта варта перастаць рабіць“.

Міністр выказаў перакананне, што санкцыйная палітыка пацярпела “найпоўны правал“: “Калі паглядзіце на лічбы, убачыце, колькі яны шкоды нанеслі еўрапейскай эканоміцы“.

Будапешт, заявіў ён, “даў выразна зразумець“ пра існаванне “чырвоных ліній“ па санкцыях: “Энергетыка, харчовая бяспека, фармацэўтыка. Мы ніколі не пагодзімся на санкцыі, якія нашкодзяць нашай энергабяспецы“.

Паводле сцвярджэння кіраўніка знешнепалітычнага ведамства, яго краіна ўвесь час, пакуль ідзе вайна ва Украіне, “адчувае ціск з боку Бруселя“.

“Але наша пазіцыя нязменная. Мы за мірныя перамовы і за спыненне агню. І за гэтую пазіцыю нас атакавалі пастаянна. Цяпер тыя, хто нас атакаваў і крытыкаваў, сёння кажуць роўна тыя ж рэчы. Яны выступаюць за мірныя перамовы і спыненне агню. Але калі быць сумленным, я не ўпэўнены ў іх шчырасці. Калі вы паглядзіце на еўрапейскіх палітыкаў, то многія з іх хочуць працягу вайны, не міру”, — сказаў Сіярта.

На яго думку, Украіна і Брусэль “спрабуюць уцягнуць Венгрыю ў вайну літаральна кожны дзень“: “Мы бачым, што гэтая вайна не можа быць выйграная Украінай на поле бою. Найлепшы спосаб скончыць гэты канфлікт — за сталом перамоваў <…> Кожны няправільны крок — гэта імавернасць Трэцяй сусветнай вайны, і мы гэтага не хочам. Так, нас правакуюць, спрабуюць уцягнуць, але мы далі выразна зразумець: гэта не наша вайна. Пакіньце нас у спакоі”.

10 верасня міністр замежных спраў Максім Рыжанкоў, каментуючы перамовы з венгерскім калегам, заявіў, што Беларусь і Венгрыя з’яўляюцца адзінымі краінамі Еўропы, якія “на справе адданыя палітыцы свабоднага рынку, роўных умоў і прынцыпаў праўдзіва партнёрскіх стасункаў“.

Венгерскі міністр прыбыў у Мінск на чале дэлегацыі, якая бярэ ўдзел у чарговым пасяджэнні двухбаковай міжурадавай камісіі па эканамічным супрацоўніцтве. Адначасова ў беларускай сталіцы праходзіць двухбаковы бізнес-форум з удзелам прадстаўнікоў дзелавых колаў дзвюх краін.

Сіярта рэгулярна наведвае Беларусь. Яго папярэднія візіты адбыліся ў лістападзе 2023 года і ў траўні і кастрычніку 2024-га. Падчас апошняга са згаданых візітаў па выніках перамоваў з Рыжанковым у Мінску ён выступіў супраць санкцый. “Мы, венгры, робім выснову, што, калі санкцыі не дзейнічаюць, не варта імі займацца, не варта іх навязваць”, — сказаў тады венгерскі міністр.

“Прытрымліваючыся стратэгіі эканамічнага нейтралітэту, мы не любім санкцыі. Мы лічым, што трэба прыбраць перашкоды і забяспечыць свабоду сусветнай эканоміцы для дзеяння”, — дадаў ён.

Урад Беларусі ўключыў Венгрыю ў спіс “недружалюбных” краін.

Пры гэтым Венгрыя застаецца адной з нямногіх краін Еўрасаюза, якая падтрымлівае публічныя кантакты з Мінскам, нягледзячы на тое, што як член ЕС яна далучылася да санкцый супраць рэжыму Аляксандра Лукашэнкі.

Гэта таксама пакуль адзіная дзяржава ЕС, амбасадар якой уручыў Лукашэнку даверчыя граматы пасля падзей 2020 года.

Мінск і Будапешт здольныя “зрабіць сумесны ўнёсак ва ўмацаванне рэгіянальнай бяспекі, ролі міжнароднага права і ўстойлівай стратэгічнай стабільнасці”, заявіў Лукашэнка, віншуючы 20 жніўня прэзідэнта Венгрыі Тамаша Шуёка і прэм’ер-міністра Віктара Орбана з нацыянальным святам — Днём Святога Іштвана.

“Агульнасць падыходаў да суверэнітэту і незалежнасці разам з клапатлівым стаўленнем да нацыянальнай ідэнтычнасці, духоўнай спадчыны і традыцый сваіх дзяржаў — гэта тое, што здаўна аб’ядноўвае нашы народы і стварае перадумовы да паглыблення двухбаковага культурна-гуманітарнага ўзаемадзеяння“, — адзначыў віншавальнік.

Лукашэнка падкрэсліў, што Мінск шануе “дружалюбныя і прагматычныя“ стасункі з Будапештам, і выказаў надзею на працяг супрацоўніцтва “на аснове ўзаемнай падтрымкі і даверу“.