Для вызваленых палітвязняў менш чым за суткі сабрана больш за 80 тыс. еўра

12 верасня, Позірк. 81,4 тыс. еўра сабрана менш чым за суткі вызваленым 11 верасня палітвязням, сведчаць актуальныя даныя на сайце фонду салідарнасці BySol.

Запытаныя 50 тыс. еўра былі сабраныя за тры гадзіны.

“Толькі што на волю выйшлі новыя палітвязні. Гэта радасная, але і трывожная навіна, якая патрабуе максімальнага ўдзелу. Пасля многіх гадоў турмы, людзей прымусова дэпартуюць з роднай краіны. З падарваным здароўем і без сродкаў да існавання. Без нашай з вамі дапамогі гэтым людзям будзе невыносна складана”, — адзначыла пры размяшчэнні аб’явы арганізацыя.

Фонд паведаміў, што кожны вызвалены атрымае 1.000 еўра праз BySol са сродкаў Міжнароднага гуманітарнага фонду, “аднак гэтай сумы недастаткова для закрыцця ўсіх пытанняў“.

“Таму мы адкрываем збор на 50.000 еўра для дапамогі палітвязням, якія былі адпушчаныя. Мы мяркуем, што многія з іх будуць у цяжкім стане і некаторым спатрэбіцца тэрміновая дапамога“, — адзначыў фонд.

11 верасня пасля сустрэчы намесніка спецпасланніка прэзідэнта ЗША ва Украіне Джона Коўла з Аляксандрам Лукашэнкам у Мінску, стала вядома, што “на просьбу прэзідэнта ЗША і іншых кіраўнікоў дзяржаў“ той прыняў рашэнне аб памілаванні “шэрагу замежных грамадзян, асуджаных за шпіёнскую дзейнасць, удзел у экстрэмісцкай і тэрарыстычнай дзейнасці і якія ўчынілі іншыя злачынныя дзеянні на тэрыторыі Рэспублікі Беларусь“.

Агулам памілавана 52 чалавекі, сярод якіх 14 замежных грамадзян: шэсць — Літвы, па двое — Латвіі, Польшчы і Германіі, адзін грамадзянін Францыі і адзін — Вялікабрытаніі, дзевяць журналістаў, а таксама палітыкі, актывісты, грамадскія дзеячы.

Як мінімум адзін з іх — Мікалай Статкевіч — адмовіўся з’язджаць у Літву (дэпартацыя была ўмовай угоды Лукашэнкі з амерыканцамі). Некалькі гадзін ён правёў паміж пунктамі пропуску Каменны Лог і Мядзінінкай, пасля чаго сышоў на беларускі бок. Пакуль яго лёс невядомы.