З 1 кастрычніка на 5% падаражэе школьнае харчаванне

16 верасня, Позірк. З 1 кастрычніка на 5% павялічыцца кошт школьнага харчавання, паведаміла прэс-служба Міністэрства адукацыі.

Адзначаецца, што грашовыя нормы на харчаванне вучняў павялічацца ў адукацыйных і аздараўленчых установах, што “дазволіць выкарыстоўваць больш разнастайныя, натуральныя і якасныя прадукты, якія адпавядаюць сучасным патрабаванням да дзіцячага рацыёну”.

Згодна з артыкулам 40 Кодэкса аб адукацыі, харчаванне прапануецца ўсім вучням ва ўстановах агульнай сярэдняй адукацыі. Прычым аплата ажыццяўляецца толькі за прадукты, якія выкарыстоўваліся для прыгатавання страў, паслугі па прыгатаванні ўключаныя ў дзяржаўную падтрымку.

Усім вучням пачатковай школы (1–4 класы) надаецца бясплатны сняданак. Усе сельскія школьнікі 1–11 класаў атрымліваюць аднаразовае бясплатнае харчаванне за кошт бюджэту. Трохразовае бясплатнае харчаванне атрымліваюць дзеці з шматдзетных, малазабяспечаных сем’яў, дзеці-інваліды.

Як паведамлялася раней, на 5 працэнтных пунктаў зменшылася доля школьнікаў, якія ў новым навучальным годзе атрымліваюць бясплатнае харчаванне — з 70% да 65%.

Усяго ў Беларусі 17 катэгорый дзяцей, якія маюць права на бясплатнае харчаванне ў той ці іншай форме.

У 2024–2025 годзе кошт харчавання склаў: аднаразовае харчаванне дзяцей 6–10 гадоў — 2,29 рубля ў выпадку, калі ежа прыгатаваная ў школе, і 2,98 рубля — калі старонняй арганізацыяй; для вучняў 11–18 гадоў — 2,70 і 3,51 рубля адпаведна.

Апошні раз школьнае харчаванне даражэла 1 верасня 2023 года.