З аўтамабіля, які патрапіў у ДТЗ у Польшчы, высыпаліся кантрабандныя беларускія цыгарэты

17 верасня, Позірк. Больш за адзін мільён кантрабандных цыгарэт (мяркуючы па фатаграфіях і відэакадрах, беларускіх, альбо ў тым ліку беларускіх, маркі NZ) канфіскавалі супрацоўнікі паліцыі горада Кольна Падляскага ваяводства Польшчы з грузавога аўтамабіля, які патрапіў у аварыю, паведамляецца 17 верасня на сайце паліцыі.

Аварыя здарылася на трасе S61 (Острув Мазавецкі — мяжа Польшчы і Літвы). Паводле звестак паліцыі, кіроўца Iveco спыніўся на аварыйнай паласе, і ў яго машыну ўрэзаўся іншы аўтамабіль той жа маркі. Адзначаецца, што “акрамя частак пашкоджаных аўтамабіляў на дарозе ляжалі тысячы пачкаў цыгарэт без польскіх акцызных марак”.

Кіроўца аўтамабіля, 36-гадовы грамадзянін Літвы, быў затрыманы і на падставе рашэння суда змешчаны пад варту на два месяцы, яму пагражае турэмнае зняволенне. Паведамляецца, што, паводле папярэдніх падлікаў, бюджэт Польшчы панёс страты ў памеры больш за 1,5 млн злотых (417 тыс. долараў) з-за нявыплаты акцызнага падатку.

17 верасня стала вядома, што больш за 23.200 пачкаў беларускіх нелегальных цыгарэт на суму больш за 400 тыс. злотых (каля 94 тыс. еўра) канфіскавалі супрацоўнікі Люблінскай мытна-падатковай службы ў Малашэвічах. Кантрабанда была знойдзена з выкарыстаннем рэнтгенаўскага абсталявання для сканавання грузавога цягніка ў адным з кантэйнераў, якія рухаліся з Кітая ў Бельгію. Супрацоўнікі Малашэвіцкага мытнага аддзялення ўстанавілі, што кантэйнер быў перавалены ў Беларусі, і выказалі здагадку, што туды змясцілі дадатковы незаконны груз. Адзначалася, што пасля вынясення судом пастановы аб канфіскацыі на карысць дзяржаўнай казны нелегальная прадукцыя падлягае знішчэнню.

9 верасня памежная ахова Польшчы паведаміла пра 16 выпадкаў кантрабанды цыгарэт з Беларусі. Цыгарэты дастаўляліся ў Падляскае ваяводства з дапамогай метэазондаў, затрымана сем атрымальнікаў грузаў. Кошт канфіскаваных цыгарэт ацанілі ў 330 тыс. злотых (91 тыс. долараў).