На 10 сутак арыштаваныя наведвальнікі Мінскага заапарка, якія напаілі аленя кока-колай

19 верасня, Позірк. На 10 сутак арыштаваныя наведвальнікі Мінскага запарка — жыхары Віцебскай вобласці 50 і 52 гадоў, якія напаілі аленя кока-колай. Рашэнне прыняў 19 верасня суд Заводскага раёна, разгледзеўшы адміністрацыйныя пратаколы, складзеныя паводле арт. 19.1 КаАП (дробнае хуліганства), паведамляе прэс-служба Мінскага гарадскога суда.

Суд заявіў, што названыя грамадзяне “ў вячэрні час 11 верасня 2025 года, знаходзячыся на тэрыторыі Мінскага заапарка, гэта значыць у грамадскім месцы, парушаючы агульнапрынятыя нормы і правілы паводзін у грамадстве, а таксама патрабаванні правілаў паводзін наведвальнікаў на тэрыторыі заапарка, наўмысна ажыццявілі дзеянні, якія выявіліся ў тым, што Р. паіў салодкім газаваным напоем са сваёй рукі і з бутэлькі высакароднага аленя, які змяшчаецца ў вальеры, а Д. хапаў і ўтрымліваў аленя за рогі, чым парушылі грамадскі парадак, праявіўшы відавочную непавагу да грамадства”.

Адзначаецца, што на судзе мужчыны “паабяцалі пасля вызвалення выбачыцца перад заапаркам і загладзіць віну — напрыклад, прынесці аленю “дэлікатэсы“ замест колы“.

Пра затрыманне наведвальнікаў стала вядома ўвечары 18 верасня. Прэс-служба ГУУС Мінгарвыканкама паведаміла, што яны размясцілі відэаролік з запісам сваіх дзеянняў у інтэрнэце, а пасля атрымання негатыўных каментароў выдалілі. Аднак да таго часу запіс ужо распаўсюдзіўся ў сацсетках. Яе выявілі супрацоўнікі мінскай міліцыі “падчас маніторынгу”.

Прэс-служба ГУУС апублікавала відэазапіс з затрыманымі, якія заявілі, што напярэдадні ўжывалі алкаголь і не задумваліся пра наступствы свайго ўчынку.