На палях Генасамблеі ААН адбудзецца абмеркаванне рэпрэсій у Беларусі і па-за яе межамі, інструментаў правасуддзя
Нью-Ёрк — пастаяннае месца правядзення сесій Генасамблеі ААН
20 верасня, Позірк. У рамках 80-й сесіі Генеральнай асамблеі ААН у Нью-Ёрку 25 верасня адбудзецца дадатковае мерапрыемства “Час падсправаздачнасці і справядлівасці: вяршэнства закона пад пагрозай у Беларусі”.
Паводле інфармацыі Еўрапейскай службы знешніх дзеянняў (ЕСЗД), суарганізатарамі выступаюць дэлегацыя ЕС, місіі Германіі, Даніі, Латвіі, Літвы і Эстоніі, а таксама Міжнародная платформа па прыцягненні вінаватых да адказнасці для Беларусі.
На сустрэчы плануецца абмеркаваць, як міжнародная супольнасць можа рэагаваць на рэпрэсіі ўнутры Беларусі і завочныя судовыя працэсы; як супрацьдзейнічаць пагрозам, сфабрыкаваным абвінавачванням, спробам экстрадыцыі, дэзінфармацыі, вярбоўкі прадстаўнікоў беларускай дыяспары і дэмакратычных інстытутаў за мяжой; якія механізмы — міжнародных судоў, універсальнай юрысдыкцыі, спецпрацэдур і дзеянняў ААН — можна выкарыстоўваць для прыцягнення да адказнасці за злачынствы ў Беларусі ды інш.
На мерапрыемстве выступяць генеральны сакратар ЕСЗД Белен Марцінэс Карбанэль, кіраўнік МЗС Літвы Кястуціс Будрыс, намесніца міністра замежных спраў Эстоніі Міна-Лііна Лінд, пастаянны дзяржсакратар па замежных справах Даніі Йепэ Транхольм-Мікельсан, кіраўніца згаданай міжнароднай платформы Андрэа Хубер ды інш. Акрамя таго, адбудзецца брыфінг беларускага дэмакратычнага лідара Святланы Ціханоўскай.
У апісанні сустрэчы адзначана, што з 2020 года ў Беларусі “назіраецца сістэматычнае разбурэнне прынцыпу вяршэнства закону”. Праводзяцца рэпрэсіі супраць “палітычных апанентаў, праваабаронцаў, юрыстаў, незалежных прафсаюзаў, журналістаў” — любых грамадзян, якіх рэжым Аляксандра Лукашэнкі “ўспрымае як патэнцыйную пагрозу”.
“Грамадзянская прастора цалкам знішчаная, суды пераўтвораныя ў інструменты рэпрэсій, а не правасуддзя, — гаворыцца ў паведамленні. — Адвакаты зазнаюць пераслед, пазбаўляюцца ліцэнзій і трапляюць у турму за абарону палітвязняў. Незалежныя суддзі былі адхіленыя, а гарантыі належнай прававой працэдуры сістэматычна парушаюцца. Тысячы людзей адвольна затрыманыя, трапілі пад катаванні і несправядлівыя судовыя працэсы. Гэтая дэградацыя вяршэнства закону суправаджаецца поўнай беспакаранасцю”.
“Вінаватыя ў сур’ёзных парушэннях правоў чалавека, уключаючы катаванні і гвалтоўныя знікненні, застаюцца беспакаранымі, а пацярпелым адмаўляюць у правасуддзі і кампенсацыі шкоды. Эксперты ААН па правах чалавека і міжнародныя няўрадавыя арганізацыі папярэджваюць, што некаторыя з гэтых парушэнняў могуць разглядацца як злачынствы супраць чалавечнасці”, — адзначана ў апісанні сустрэчы.
Акрамя таго, гаворыцца, што рэжым Лукашэнкі “выносіць рэпрэсіі па-за межы краіны праз транснацыянальны пераслед беларусаў у выгнанні, палітычна матываваныя абвінавачванні і запыты на экстрадыцыю”.
“Усё часцей праводзяцца завочныя судовыя працэсы, па якіх апазіцыйным лідарам, праваабаронцам і журналістам прызначаюцца працяглыя турэмныя тэрміны. <…> Рэжым праводзіць кампаніі па дэзінфармацыі і выведвальныя аперацыі за мяжой, нацэленыя на дыяспару і дэмакратычныя структуры. Тэрыторыя Беларусі таксама выкарыстоўваецца для садзейнічання агрэсіўнай вайне Расіі супраць Украіны, што падкрэслівае шырэйшае грэбаванне міжнародным правам з боку рэжыму”, — гаворыцца ў паведамленні.
Падкрэсліваецца, што прыцягненне вінаватых да адказнасці і аднаўленне справядлівасці павінны быць “ключавымі элементамі” рэакцыі на крызіс у Беларусі.
Ціханоўская на наступным тыдні наведае ЗША
20 верасня, Позірк. Візіт беларускага дэмакратычнага лідара Святланы Ціханоўскай у Злучаныя Штаты Амерыкі адбудзецца 22–25 верасня. Паводле інфармацыі ў тэлеграм-канале палітыка, галоўная мэта палягае ва ўдзеле ў мерапрыемствах падчас 80-й сесіі Генеральнай асамблеі ААН. Адзначаецца, што ў рамках Тыдня высокага …
