Намеснік старшыні Савета Рэспублікі Татарыновіч анансаваў павышэнне “падаткаў на багацце”

21 верасня, Позірк. Аб “падыходах да фарміравання праекта рэспубліканскага бюджэту на 2026 год” паведаміў у інтэрв’ю тэлеканалу СТБ намеснік старшыні Савета Рэспублікі Нацыянальнага сходу (СР НС) Уладзіслаў Татарыновіч.

Паводле яго слоў, праект бюджэту “сфарміраваны на досыць збалансаванай аснове”: “Тыя меры падатковай палітыкі, якія ў нас прадугледжваюцца на наступны год, носяць такі планавы характар”.

“Падатковыя складнікі — гэта каля 70% агульных даходаў бюджэту. Таму будуць у нас праіндэксаваныя стаўкі падаткаў, якія ўстаноўленыя ў беларускіх рублях. Будуць рэалізаваныя меры падатковага характару, якія выяўленыя практыкай прымянення. Ну і, вядома, будзе рэалізаваны шэраг мер, звязаных з павышэннем справядлівасці падаткаабкладання”, — сказаў Татарыновіч.

Ён адзначыў, што ў краіне ёсць “грамадзяне, якія маюць даходы, якія перавышаюць не проста сярэдні ўзровень заработнай платы па краіне, а па <…> мерках [уладаў] высокія даходы”.

“Вышэй нейкай пэўнай мяжы ўвесці дадатковую дыферэнцыяцыю, дадатковую стаўку падаходнага падатку, — удакладніў намеснік старшыні СР НС. — Гаворка ідзе пра тое, што тыя нашы грамадзяне або ўласнікі, уладальнікі, у якіх кватэры, жылыя дамы па сваіх фізічных параметрах, па квадратных метрах перавышаюць у нашым разуменні сярэднія параметры. Узмацніць у гэтых адносінах падаткаабкладанне падаткам на нерухомасць”.

Улады таксама маюць намер “выраўняць стаўкі транспартнага падатку для індывідуальных прадпрымальнікаў, для юрыдычных асоб, паколькі ў многіх выпадках яны ажыццяўляюць аднолькавыя віды дзейнасці, таму ўмовы ў гэтых адносінах павінны быць роўныя”, сказаў Татарыновіч, падкрэсліўшы, што “гэта планавая праца, якая праводзілася і ў папярэднія гады”.

“Бюджэт сфарміраваны па традыцыйных падыходах, першачарговыя выдаткі — гэта выдаткі на заработную плату, складаюць каля 30%, калі браць ад агульнага кансалідаванага бюджэту. Плануецца далейшы рост заработнай платы ў бюджэтных арганізацыях, як за кошт павышэння тарыфнай стаўкі, базавай стаўкі, так і за кошт прымянення адпаведных, стымулюючых выплат. Трэці блок — гэта традыцыйны блок нашых сацыяльных выдаткаў. На гэтыя мэты плануецца накіраваць больш за 40 млрд беларускіх рублёў з ростам па такіх традыцыйных напрамках, як і адукацыя, і ахова здароўя, культура, сацыяльная абарона, спорт”, — адзначыў намеснік старшыні верхняй палаты парламента.

Намеснікам старшыні СР НС Татарыновіч абраны 16 верасня. Раней з 2009 года ён займаў пасаду намесніка міністра фінансаў.

30 снежня 2023 года Аляксандр Лукашэнка падпісаў закон № 327-З “Аб змене законаў у пытаннях падаткаабкладання”.

Сярод іншага папраўкі ўводзяць так званы “падатак на багацце” — павялічваюць з 13 да 25% падаходны падатак для фізічных асоб, чые сукупныя даходы за падатковы перыяд перавысілі 200.000 рублёў. Гаворка пра даходы, атрыманыя падаткаплацельшчыкам “ад крыніц у Рэспубліцы Беларусь у выглядзе дывідэндаў, на падставе працоўных дагавораў, а таксама на падставе грамадзянска-прававых дагавораў, прадметам якіх з’яўляюцца выкананне работ, аказанне паслуг і стварэнне аб’ектаў інтэлектуальнай уласнасці”.

Такім чынам, падвышаная стаўка падаходнага падатку закране фізічныя асобы, якія атрымліваюць штомесяц больш за 16.667 рублёў (каля 5.245 долараў па актуальным на той момант курсе Нацбанка).

Намеснік кіраўніка адміністрацыі Лукашэнкі Максім Ермаловіч у эфіры беларускага тэлебачання 19 кастрычніка заявіў, што 25%-ная стаўка будзе прымяняцца толькі да перавышэння гадавой сумы даходаў. “Калі сума складзе 210 тысяч, падаткаплацельшчыку будзе неабходна заплаціць падатак па павышанай стаўцы з 10 тысяч, пры гэтым з 200 тысяч падатак будзе выплачвацца па стандартнай стаўцы 13%”, — патлумачыў чыноўнік.

На яго думку, прагрэсіўная шкала падаткаабкладання не з’яўляецца жорсткай, “будзе працаваць лепш, чым любыя іншыя спосабы кантролю з боку падатковых органаў” і не справакуе спробаў бізнесу і грамадзян абыходзіць падвышаныя падаткі.

Зацверджаныя папраўкі таксама ўводзяць штогадовую індэксацыю стаўкі асобных падаткаў з улікам інфляцыі; павялічвае стаўку падатку на прыбытак для высокарэнтабельных арганізацый і прадпрыемстваў усіх форм уласнасці з 20 да 25% пры атрыманні прыбытку звыш 25 млн рублёў на год; падвышае да 30% падаходны падатак для індывідуальных прадпрымальнікаў з сукупным прыбыткам ад 500.000 рублёў ды інш.