25 верасня, Позірк. Еўрапейскі банк рэканструкцыі і развіцця (ЕБРР) у верасні пагоршыў травеньскі прагноз росту валавога ўнутранага прадукту ў Беларусі на 2025 і 2026 гады, вынікае з абноўленага банкам агляду.
У прыватнасці, калі ў двух папярэдніх прагнозах рост ВУП у Беларусі ў 2025 годзе прагназаваўся спецыялістамі банка на ўзроўні 2,5%, то цяпер ён ацэньваецца ў 1,7%, гэта значыць зменшыўся амаль на траціну. Перагледжаны і прагноз на 2026 год: у траўні ЕБРР ацэньваў рост ВУП у 2,5%, цяпер ён зніжаны да 2,3%.
“У студзені — ліпені 2025 года рэальны рост ВУП запаволіўся да 1,3% у гадавым вылічэнні, у асноўным у выніку скарачэння вытворчасці ў апрацоўчай прамысловасці і сельскай гаспадарцы. Інфляцыя ў ліпені вырасла да 7,4%, што адлюстроўвае рост цэн на прадукты харчавання і паслугі. Улічваючы ўзмацненне залежнасці ад расійскай эканомікі і запаволенне росту ў Расіі, кароткатэрміновыя эканамічныя перспектывы выглядаюць неспрыяльнымі”, — адзначае банк.
У аглядзе таксама гаворыцца, што санкцыі, якія дзейнічаюць у дачыненні да Беларусі, “па-ранейшаму ствараюць значныя рызыкі зніжэння [ВУП]”.
Зніжэнне росту ВУП на 0,2% (у параўнанні з травеньскім прагнозам) як у 2025, так і ў 2026 гадах (у абодвух выпадках з 1,5% да 1,3%) ЕБРР чакае ў Расіі.
У дакладзе ўтрымліваюцца прагнозы па іншых дзяржавах былога СССР: у Азербайджане рост ВУП у гэтым і наступным гадах, на думку аўтараў, складзе 2% і 2,5% (у травеньскім прагнозе было 3% і 2,5%) адпаведна, Арменіі — 5% і 4,5% (без змен), Грузіі — 7% (6%) і 5%, Казахстане — 5,7% (4,9%) і 4,5%, Кыргызстане — 9% (7%) і 6%, Латвіі — 0,9% (1,8%) і 1,9% (2,4%), Літве — 2,6% і 3,2% (2,6%), Малдове — 1,5% (1,8%) і 3,8%, Таджыкістане — 7,5% (7%) і 5,7%, Туркменістане — па 6,3%, Узбекістане — 6,7% (6%) і 6%, Украіне — 2,5% (3,3%) і 5%, Эстоніі — 0,5% (1,3%) і 2%.
Паводле звестак Белстата, ВУП Беларусі павялічыўся за студзень — жнівень 2025 года на 1,6% да аналагічнага перыяду 2024-га і ў бягучых цэнах склаў 180,1 млрд рублёў. У студзені 2025 года гэты паказчык быў на ўзроўні 3,7% (20,5 млрд), студзені — лютым — 3,1% (38,7 млрд), студзені — сакавіку — 3,1% (59,4 млрд), студзені — красавіку — 2,8% (81,4 млрд), студзені — траўні — 2,5% (101,4 млрд), студзені — чэрвені — 2,1% (129 млрд), студзені — ліпені — 1,3% (155,2 млрд).
Паводле зацверджаных Лукашэнкам найважнейшых эканамічных прагнозных (дэ-факта — планавых) параметрах на 2025 год, рост ВУП павінен скласці 4,1%.
Зніжэнне тэмпаў росту ВУП Беларусі да 1,6% прагназуе Еўразійскі фонд стабілізацыі і развіцця ў сваім рэгіянальным эканамічным аглядзе, апублікаваным 16 красавіка.
24 чэрвеня аналітыкі Еўразійскага банка развіцця ў макраэканамічным прагнозе на 2025-2027 гады адзначылі, што чакаюць рост ВУП Беларусі па выніках 2025 года на ўзроўні 3%.
Міжнародны валютны фонд у красавіцкім аглядзе прагназаваў, што ВУП Беларусі павялічыцца ў 2025 годзе на 2,8%.
12 чэрвеня Сусветны банк выдаў прагноз, згодна з якім беларуская эканоміка ў 2025 годзе вырасце на 2,2%.
У студзені 2024 года прырост ВУП Беларусі складаў 2,8%, студзені — лютым — 4%, студзені — сакавіку — 4,1%, студзені — красавіку — 5,1%, студзені — траўні — 5,2%, студзені — чэрвені — 5%, студзені — ліпені — 5,5%, студзені — жніўні — 4,9%, студзені — верасні — 4,5%, студзені — кастрычніку — 4,2%, студзені — лістападзе — 3,9%, па выніках года — 4%.
