13 нядаўна вызваленых і вывезеных у Літву палітвязняў выказала жаданне легалізавацца ў Польшчы — Латушка

26 верасня, Позірк. З апошняй групы вызваленых палітычных зняволеных 13 чалавек звярнуліся ў прадстаўніцтва па сацыяльнай палітыцы Аб’яднанага пераходнага кабінета (АПК) з просьбай пасадзейнічаць легалізацыі ў Польшчы, паведаміў “Позірку” намеснік кіраўніцы АПК, кіраўнік Народнага антыкрызіснага ўпраўлення (НАУ) Павел Латушка.

“Я перадаў ведамству па справах замежнікаў адпаведны спіс і гэтую просьбу. У нас ужо адбыўся працоўны кантакт з ведамствам па справах замежнікаў, дакументы былі перададзеныя і ў Міністэрства замежных спраў Польшчы”, — паведаміў ён.

Паводле слоў палітыка, дасягнута папярэдняя дамоўленасць, што польскі бок “будзе старацца садзейнічаць легалізацыі тых палітычных вязняў, якія выйшлі з турмаў у Беларусі”, і “не будзе прымяняць да іх Дублінскую папраўку” (Дублінскі рэгламент вызначае, якая краіна ЕС нясе адказнасць за разгляд заявы пра наданне міжнароднай абароны або прытулку, каб прадухіліць падачу некалькіх заяў у розных краінах і вызначыць адзіную адказнасць за разгляд кожнай заявы).

Пры гэтым Латушка падкрэсліў, што “кожны выпадак мае індывідуальны характар, але ў цэлым агульны падыход пазітыўны”.

У рамках працоўнай групы па пытаннях легалізацыі беларусаў у Польшчы (Латушка ўзначальвае беларускую частку, з польскага боку — кіраўнік Упраўлення па справах іншаземцаў Томаш Цытрыновіч), паводле слоў суразмоўцы, дасягнутая дамоўленасць правесці праз тыдзень асобнае пасяджэнне.

Гэтае пасяджэнне, як сказаў Латушка, “будзе прысвечанае выключна пытанням легалізацыі палітвязняў, якія выйшлі з турмаў”. “Мы таксама абмяркуем і далейшыя магчымыя крокі, калі, як мы ўсе спадзяемся, вызваленні будуць працягвацца”, — сказаў ён.

Латушка выказаў спадзеў на садзейнічанне польскага боку ў гэтым пытанні і выказаў удзячнасць за ўжо аказаную падтрымку ў пытаннях легалізацыі былых палітзняволеных у Польшчы.

52 зняволеных, у тым ліку 40 палітычных, былі вызваленыя 11 верасня ў рамках здзелкі паміж адміністрацыяй прэзідэнта ЗША Дональда Трампа і Аляксандрам Лукашэнкам. Умовай вызвалення быў выезд вязняў з краіны. Усіх, акрамя апазіцыйнага палітыка Мікалая Статкевіча, які адмовіўся пакідаць Беларусь, перавезлі ў Літву.