Першы экзамен на веданне мовы здадуць у Беларусі 200 мігрантаў
29 верасня, Позірк. Першы экзамен для замежнікаў на веданне рускай або беларускай мовы пройдзе 30 верасня, здаваць яго плануюць каля 200 працоўных мігрантаў. Такая інфармацыя прагучала ў сюжэце дзяржтэлеканала СТБ 28 верасня.
Экзамен будзе праходзіць у аўдыторыях шасці ВНУ, адзначае тэлеканал. Паведамляецца, што выпрабаванні пройдуць па стандартах, якія выкарыстоўваюцца пры цэнтралізаваным экзамене або цэнтралізаваным тэставанні: у аўдыторыях будуць устаноўленыя відэакамеры, туды нельга прыносіць мабільныя тэлефоны і іншыя сродкі сувязі і пісьмовыя матэрыялы, забаронена мяняцца месцамі і бланкамі тэстаў, размаўляць з іншымі экзаменуемымі, выносіць заданні, фатаграфаваць, выходзіць з памяшкання без дазволу.
Экзамен будзе праводзіцца ў форме пісьмовага тэставання. На яго выкананне адводзіцца паўгадзіны. За гэты час неабходна адказаць на 20 пытанняў, 17 з іх з прапанаванымі варыянтамі адказу.
Для паспяховай здачы неабходна даць правільныя адказы як мінімум на палову пытанняў. У выпадку няздачы працоўны дагавор з мігрантам не заключаць.
Пры гэтым на пераздачу можна зарэгістравацца неабмежаваную колькасць разоў.
У сюжэце таксама было паведамлена, што “кадры сёння гэта аснова нацыянальнай бяспекі” Беларусі.
Толькі за 1 паўгоддзе 2025 у Беларусь заехалі для працы больш за 21.000 замежнікаў, “якія жадаюць працаваць”, паведаміла СТБ. Раней такую ж лічбу працаўладкаваных у Беларусі мігрантаў называў на той момант начальнік Дэпартамента грамадзянства і міграцыі МУС Аляксей Бягун.
Пастановай урада ад 3 верасня № 477 вызначаны пералік прафесій рабочых і пасад служачых, для занятку якімі замежным мігрантам спатрэбіцца прайсці ацэнку ведання валодання адной з дзяржаўных моў — беларускай альбо рускай.
Згодна з дакументам, веданне адной з дзяржаўных моў з’яўляецца абавязковым для прадстаўнікоў 11 прафесій: кіроўцы аўтамабіля; афіцыянта; цырульніка; прадаўца; санітара; адміністратара; акушэра; лекара-спецыяліста (усіх медыцынскіх спецыяльнасцяў); медыцынскай сястры і медбрата (усіх медыцынскіх спецыяльнасцяў); памочніка ўрача па амбулаторна-паліклінічнай дапамозе; фельчара (усіх медыцынскіх спецыяльнасцяў).
11 красавіка Аляксандр Лукашэнка па выніках сустрэчы ў Мінску з кіраўніком урада Пакістана Шахбазам Шарыфам заявіў, што краіны дамовіліся выпрацаваць механізм прыезду ў Беларусь пакістанскіх працоўных мігрантаў. Паводле яго слоў, Беларусь гатова прыняць 100–150 тыс. спецыялістаў.
Гэтыя планы выклікалі неадназначную рэакцыю ў грамадстве, якая, у сваю чаргу, выклікала раздражненне ў беларускіх уладаў.
14 жніўня Лукашэнка ў віншаванні прэм’ер-міністру Пакістана Шахбазу Шарыфу з Днём незалежнасці нагадаў яму пра “накіраванне пакістанскіх кваліфікаваных спецыялістаў для працы ў Беларусь”.
