За выхадныя ў Польшчы прызямлілася 12 паветраных шароў з цыгарэтамі з Беларусі, затрыманыя двое беларусаў

29 верасня, Позірк. Дванаццаць паветраных шароў, выпушчаных кантрабандыстамі з Беларусі, прызямліліся ў памежным Падляскім ваяводстве Польшчы ў мінулыя выходныя, яны былі выяўленыя ў сямі месцах, паведаміла RMF FM са спасылкай на звесткі памежнай аховы краіны.

Паводле даных памежнікаў, у гэтых шарах перавозілася каля тысячы блокаў цыгарэт, кошт ацэньваецца прыкладна ў 180 тыс. злотых (каля 48 тыс. долараў).

Паводле інфармацыі паліцыі, у памежнай Сакулцы затрымана некалькі чалавек, уключаючы дваіх беларусаў, усім гэтым людзям прад’яўленыя абвінавачванні ў адпаведнасці з крымінальна-фінансавым заканадаўствам.

Адзначаецца, што кантрабандысты скарысталіся спрыяльнымі ўмовамі надвор’я, перш за ўсё ўсходнім ветрам, што палегчыла транспарціроўку паветраных шароў з Беларусі ў Польшчу. 

З пачатку года памежная ахова Польшчы канфіскавала 104 паветраныя шары, якія выкарыстоўваліся для кантрабанды, паліцыя — дзясяткі падобных прадметаў.

9 верасня памежная ахова паведаміла аб канфіскацыі 16 паветраных шароў з кантрабанднымі беларускімі цыгарэтамі.