МЗС Эстоніі перасцерагло грамадзян ад паездак у Беларусь праз пагрозу пераследу

30 верасня, Позірк. Міністэрства замежных спраў Эстоніі перасцерагло грамадзян краіны ад паездак у Беларусь “праз выпадкі апытання і затрымання”, а таксама “складанасці з атрыманнем консульскай дапамогі”, паведамляе выданне ERR.

Паводле слоў прадстаўніка знешнепалітычнага ведамства Ангелы Саар-Рааман, “было даволі шмат выпадкаў і на мяжы, і ўнутры Беларусі, калі з нашымі грамадзянамі ўступалі ў кантакт, іх апытвалі або затрымлівалі, як і грамадзян іншых краін ЕС”.

Дыпламат падкрэсліла, што падчас знаходжання ў Беларусі “сітуацыя можа стаць вельмі непрыемнай для грамадзян”, бо ў Мінску няма ні амбасадара, ні консула: “Варта ўлічваць, што аказанне консульскай дапамогі можа заняць нашмат больш часу, чым звычайна, ці ўвогуле быць немагчымым”.

“Важным крокам”, які “збліжае беларусаў і эстонцаў” назвала 24 сакавіка дэмакратычны лідар Святлана Ціханоўская адкрыццё офіса дэмсіл Беларусі ў Таліне.

“Гэта не толькі практычны палітычны крок, але і вельмі важны сімвалічны жэст салідарнасці. Гістарычна беларусы і эстонцы былі блізкія адно аднаму”, — падкрэсліла Ціханоўская, падзякаваўшы за падтрымку МЗС Эстоніі.

На думку дэмлідара, Эстонія дапамагае беларусам і ўкраінцам змагацца з расійскім імперыялізмам. “Пасля гвалтоўнага захопу ўлады [Аляксандрам] Лукашэнкам у 2020 годзе Эстонія прыняла сотні беларускіх палітычных уцекачоў. Многія з іх засталіся ў Эстоніі і ўносяць свой уклад у эканоміку, грамадства і дэмакратыю краіны. Мы вельмі ўдзячныя вам за тое, што вы працягваеце нам руку дапамогі ў гэтыя нялёгкія часы”, — падкрэсліла Ціханоўская.

19 ліпеня 2024-га беларускія ўлады распаўсюдзілі бязвізавы рэжым на грамадзян яшчэ 35 краін Еўропы.

Гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі. Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.

Бязвіз для жыхароў 38 еўрапейскіх краін дзейнічае да канца 2025-га, аднак, хутчэй за ўсё, будзе падоўжаны, як гэта ўжо адбывалася.

Грамадзяне гэтых дзяржаў могуць уязджаць у Беларусь без візы праз усе наземныя і паветраныя міжнародныя пункты пропуску “па сапраўдных дакументах”, знаходзіцца на беларускай тэрыторыі “не больш за 30 сутак з дня ўезду”.