Лукашэнка мае намер забараніць перадачу сельскагаспадарчых земляў, пакінуўшы такое права толькі сабе
3 кастрычніка, Позірк. Увесці ў 2026 годзе поўную забарону на адчужэнне ў Беларусі зямель сельскагаспадарчага прызначэння паабяцаў Аляксандр Лукашэнка 3 кастрычніка падчас паездкі ў Салігорскі раён (Мінская вобласць).
“Ніякіх новых зямель з сельгасугоддзяў мы пад будаўніцтва, прысядзібныя ўчасткі даваць не будзем! — цытуе палітыка неафіцыйны тэлеграм-канал яго прэс-службы. — У нас велізарная колькасць участкаў у вёсках… Гэта выключана! Адзінкавыя выпадкі — пад інвестпраекты. І гэта — рашэнні прэзідэнта. Каб усе разумелі, налета будзе поўная забарона на адчужэнне зямель сельгаспрызначэння. Гэта наш здабытак, і не мы гэта зрабілі, гэта нашы продкі”.
Цяпер парадак адабрання сельскагаспадарчых зямель у Беларусі рэгулюецца арт. 49 Кодэкса аб зямлі (“Прадастаўленне зямельных участкаў з сельскагаспадарчых зямель сельскагаспадарчага прызначэння, зямель прыродаахоўнага, аздараўленчага, рэкрэацыйнага, гісторыка-культурнага прызначэння, лясных зямель ляснога фонду для мэт, не звязаных з прызначэннем гэтых зямель”).
У адпаведнасці з заканадаўствам вынятак магчымы “для размяшчэння аб’ектаў нерухомай маёмасці” ў выпадках, калі такое размяшчэнне дазволенае прэзідэнтам або ўрадам і зацверджанымі імі праграмамі, прадугледжанае генпланамі населеных пунктаў або горадабудаўнічымі праектамі, схемамі землеўпарадкавання раёнаў, праектамі ўнутрыгаспадарчага землеўпарадкавання і схемамі комплекснай тэрытарыяльнай арганізацыі абласцей ды іншых адміністрацыйна-тэрытарыяльных і тэрытарыяльных адзінак.
Акрамя таго, можна адбіраць зямлю “для размяшчэння аб’ектаў нерухомай маёмасці ў выключных выпадках, калі адсутнічае магчымасць размяшчэння такіх аб’ектаў на зямельных участках з іншых катэгорый і відаў зямель; для здабычы агульнараспаўсюджаных карысных выкапняў, у тым ліку торфу, а таксама для выкарыстання геатэрмальных рэсурсаў нетраў і сушкі лігніну; у іншых выпадках, прадугледжаных законамі ці актамі прэзідэнта”.
