Галоўчанка прызначаны кіраўніком групы па дапрацоўцы праекта праграмы сацыяльна-эканамічнага развіцця

3 кастрычніка, Позірк. Загад аб стварэнні рабочай групы па дапрацоўцы праекта праграмы сацыяльна-эканамічнага развіцця да 2030 года падпісаў Аляксандр Лукашэнка, паведамляе яго прэс-служба.

Кіраўніком прызначаны кіраўнік Нацыянальнага банка Раман Галоўчанка. Як адзначаецца, у склад групы ўключаны “дэлегаты Усебеларускага народнага сходу, дзеючыя і былыя кіраўнікі органаў дзяржаўнай улады, арганізацый рэальнага сектара эканомікі, навуковых і грамадскіх арганізацый”. Паімённы спіс прэс-служба не прыводзіць.

Рабочай групе даручана разам з урадам дапрацаваць праект і далажыць пра яго Лукашэнку. Пасля гэтага дакумент будзе вынесены на разгляд УНС.

Правядзенне чарговага пасяджэння УНС, на якім павінна быць прынята праграма, запланавана на канец года, паведаміў кіраўнік Адміністрацыі прэзідэнта Дзмітрый Круты 28 верасня.

23 верасня на сустрэчы з прэм’ер-міністрам Аляксандрам Турчыным Лукашэнка паведаміў, што даў даручэнне Галоўчанку па стварэнні аналітычнай групы па эканоміцы ў Нацбанку.

“Хачу, каб вы ведалі, каб тут не было ніякай рэўнасці, — цытавала Лукашэнку яго прэс-служба. — Я папрасіў былога прэм’ера (былых жа не бывае) — малады чалавек, адукаваны, вопытны, каб ён (гаворка пра папярэдніка Турчына, 52-гадовага Галоўчанку, які ачольваў урад да 10 сакавіка 2025 года. — “Позірк”.) стварыў групу ў сябе”.

Нацбанк будзе “падсвечваць” Лукашэнку “карціну, што рэальна адбываецца, і тэндэнцыі, якія складаюцца ў той ці іншай сферы”, заявіў Галоўчанка 26 верасня.

Урад вызначыў пяць прыярытэтаў у праекце Праграмы сацыяльна-эканамічнага развіцця на 2026–2030 гады, вынікае са слоў міністра эканомікі Юрыя Чабатара.

Гэта арэнднае жыллё, якасныя дарогі, “развіццё праз лічбавізацыю і тэхналагічнасць рэальнага сектара эканомікі”, “моцныя рэгіёны” і турызм (відэа яго адказаў дзяржСМІ апублікавана прэс-службай урада паводле вынікаў абмеркавання праекта 18 верасня).

Жыхары Беларусі звязваюць свае чаканні ад новай пяцігодкі з такімі каштоўнасцямі, як “жыллё, сям’я, праца, запатрабаванасць, здароўе, даступнасць і якасць аховы здароўя, працягласць жыцця, якасць жыцця бацькоў”, заявіў дырэктар дзяржаўнага Беларускага інстытута сацыялагічных даследаванняў (БІСД) Алег Макараў у красавіку.