У парламент Чэхіі ўпершыню праходзіць партыя аўтамабілістаў, у праграме якой адмова ад супрацоўніцтва з беларускім рэжымам і кантакты з апазіцыяй

Апублікавана на адкрытай версіі “Позірку” 5 кастрычніка 2025 года ў 11:40

5 кастрычніка, Позірк. Адмова ад супрацоўніцтва з беларускім рэжымам і афіцыйныя кантакты з апазіцыяй — адзін з пунктаў праграмы правацэнтрысцкай папулісцкай партыі Motoristé sobě — AUTO (“Аўтамабілісты для сябе“), якая ўпершыню праходзіць у парламент Чэхіі па выніках праведзеных 3 і 4 кастрычніка чарговых выбараў.

Партыя пераадолела 5-працэнтны бар’ер, набраўшы 6,77% галасоў пасля падліку бюлетэняў на 99,97% выбарчых участкаў (14.815 з 14.819).

У раздзеле перадвыбарнай праграмы “Грамадзянскія правы і аўтарытарныя рэжымы“ гаворыцца, што найвышэйшай мэтай партыі з’яўляюцца асабістая свабода і грамадства, у якім выконваюцца фундаментальныя грамадзянскія правы. “Супрацоўніцтва з рэжымамі, якія гэтыя правы парушаюць, для нас непрымальнае. Мы выключаем любы дыялог з прадстаўнікамі таталітарных краін, такіх як КНДР або Беларусь“, — падкрэсліваецца ў праграме, якую прааналізаваў “Позірк”.

Далей партыя адзначае, што выступае за неўмяшанне, аднак “даўно пераследуемая беларуская апазіцыя заслугоўвае падтрымкі і фармалізаваных кантактаў з афіцыйнымі прадстаўнікамі Чэшскай Рэспублікі на высокім дыпламатычным і канстытуцыйным узроўні“.

“Аўтамабілісты” называюць сябе еўрарэалістамі, заяўляюць аб жаданні не выходзіць з Еўрасаюза, а рэфармаваць яго, каб краіны-ўдзельніцы “разам імкнуліся толькі да таго, пра што дамовіліся, але ў астатнім не ўмешваліся ва ўнутраныя справы адзін аднаго“. Партыя выступае за захаванне сяброўства ў НАТО, якое “павінна заставацца ключавым абаронным альянсам усяго заходняга свету“, бо “любая іншая абаронная арганізацыя ў нашым рэгіёне ўяўляе для Чэшскай Рэспублікі пагрозу ўцягвання ў вайну”. Палітычныя і гандлёвыя адносіны з Расіяй выключаюцца, “пакуль ідзе вайна ва Украіне”.

Партыя ўзнікла ў 2017 годзе спачатку як рух “Рэферэндум аб Еўрапейскім саюзе“. Затым ён быў пераўтвораны ў партыю незалежнасці Чэшскай Рэспублікі. Цяперашнюю назву носіць з траўня 2022 года.

У ніжнюю палату парламента Чэхіі па выніках выбараў праходзіць 6 з 26 палітычных сіл: правапапулісцкі еўраскептычны рух ANO (34,54% галасоў; 80 крэслаў), альянс цэнтрысцкіх і правацэнтрысцкіх сіл SPOLU, які кіраваў дагэтуль (23,34%; 52), ліберальнае цэнтрысцкае аб’яднанне мэраў і незалежных муніцыпальных дэпутатаў STAN (11,22%; 22), ліберальна-прагрэсівісцкая цэнтрысцкая партыя Česká pirátská strana (8,95%; 18), крайне правая еўраскептычная партыя Svoboda a přímá demokracie (7,78%; 15) і вышэйназваная Motoristé sobě — AUTO (13 месцаў).

На выбарчым участку, адкрытым у чэшскай амбасадзе ў Мінску, прагаласаваць прыйшло 7 з 8 выбаршчыкаў (87,5%), унесеных у спіс. 2 галасы (28,57%) атрымаў рух ANO, па 1 (14,28%) — STAN, Motoristé sobě, SPOLU, а таксама камуністычны рух Stačilo! (“Хопіць!“), які не праходзіць у парламент (4,30%), і еўраскептыкі з Česká suverenita sociální demokracie (0,18%).