Пачобут ужо паўтара месяца ўтрымліваецца ў ПКТ, два тыдні таму з ім сустракалася кіраўніца СПБ Борыс

7 кастрычніка, Позірк. Палітвязень Анджэй Пачобут з 23 жніўня знаходзіцца ў памяшканні камернага тыпу (ПКТ) у калоніі №1 горада Наваполацка (Віцебская вобласць), паведамляе Беларуская асацыяцыя журналістаў (БАЖ) са спасылкай на сваю крыніцу.

Адзначаецца, што ў ПКТ журналіста змясцілі на шэсць месяцаў — да лютага 2026 года.

Паводле даных БАЖ, у верасні перарывалася перапіска з Пачобутам, што дазваляе меркаваць, што ён “быў у штрафным ізалятары, дзе вязням не дазваляюць нават лісты”.

Паведамляецца, што палітвязень не атрымлівае “ні рэчавых, ні прадуктовых перадач”, а ў ПКТ “увогуле зрэзанае харчаванне”.

23 верасня з Пачобутам сустракалася старшыня неафіцыйнага Саюза палякаў (СПБ) Анжаліка Борыс. Яна нічога не паведаміла пра асаблівыя ўмовы ўтрымання палітвязня.

У інтэрв’ю выданню Newsweek на пытанне журналіста, ці знаходзіцца Пачобут у ізалятары, Борыс адказала: “Не магу гэта каментаваць”.

Яна паведаміла пра сур’ёзныя праблемы са здароўем палітвязня, у якога, паводле яе слоў, гіпертанія і арытмія. У верасні яму зрабілі аперацыю на скуры ў турэмным шпіталі.

“[Падчас нашай сустрэчы 23 верасня] ён расказаў мне, што нават набраў вагу за тыдзень, праведзены ў турэмным шпіталі. Што тычыцца вачэй, ён мне нічога не сказаў, таму мне складана сказаць. Зрэшты, агульнавядома, што ў калоніі зрок пагаршаецца ва ўсіх. <…> Я спытала Анджэя, ці трэба яму што-небудзь, адправіць яму лекі. Ён адказаў, што не, ён атрымлівае лекі”, — сказала Борыс.

Далей кіраўнік СПБ паўтарыла тое, што паведамляла выданню Rzeczpospolita у верасні. Яна тады заявіла, што вядзе перамовы аб вызваленні Пачобута “як з польскім, так і з беларускім бокам”.

У прыватнасці, паводле слоў Борыс, з просьбай аб вызваленні палітвязня яна звярнулася да Аляксандра Лукашэнкі.

Адказваючы на пытанне, чаму жонцы Пачобута ўлады не дазваляюць бачыцца з ім, а Борыс 23 верасня ўжо другі раз наведала палітвязня ў калоніі, кіраўнік СПБ сказала: “Не ведаю. Магчыма, гэта таму, што за мной стаіць арганізацыя з тысяч чалавек. Я стараюся падтрымліваць хоць нейкую сувязь з Анджэем. Я не хачу нікога падвяргаць небяспецы. Я хачу дапамагаць, а не шкодзіць. І я рада, што ні Польшча, ні Беларусь не пацярпелі праз маю дзейнасць”.

Борыс падкрэсліла, што польская меншасць у Беларусі “не займаецца палітыкай”, не хоча “ніякай канфрантацыі”.

Адказваючы на пытанне, ці заключыла яна здзелку з рэжымам Лукашэнкі, Борыс адзначыла: “Я не заключала ніякіх здзелак і не падпісвала ніякіх пагадненняў. Знаходзячыся ў турме, я ні на кога не даносіла”.

Кіраўнік СПБ таксама паведаміла, што 23 верасня тэма гатоўнасці Пачобута пакінуць Беларусь у выпадку вызвалення не абмяркоўвалася. У жніўні 2024 года Борыс сцвярджала, што журналіст пагадзіўся пакінуць Беларусь у выпадку вызвалення.

8 лютага 2023 года Гродзенскі абласны суд прыгаварыў журналіста і актывіста неафіцыйнага Саюза палякаў Пачобута да 8 гадоў пазбаўлення волі ў калоніі ва ўмовах узмоцненага рэжыму. Суддзя Дзмітрый Бубенчык прызнаў яго вінаватым паводле ч. 3 арт. 130 (распальванне расавай, нацыянальнай, рэлігійнай або іншай сацыяльнай варожасці або варажнечы) і ч. 3 арт. 361 (заклікі да мер абмежавальнага характару (санкцыяў), накіраваных на прычыненне шкоды нацыянальнай бяспецы) Крымінальнага кодэкса.

Пасля рашэння суда, 10 лютага 2023 года, Польшча на нявызначаны тэрмін закрыла адзін з двух даступных на той час для падарожнікаў пунктаў пропуску — Баброўнікі (з беларускага боку Бераставіца).

11 верасня, пасля прымусовага вывазу ў Літву больш за 50 зняволеных у рамках угоды паміж Вашынгтонам і Мінскам, прэм’ер-міністр Польшчы Дональд Туск заявіў, што пытанне вызвалення Пачобута застаецца прыярытэтам для Варшавы. “[Пачобут] з’яўляецца першым у спісе нашых чаканняў”, — сказаў ён. Туск не выключыў, што “гэта прычына, па якой яны не жадаюць яго вызваляць”.

17 верасня на сустрэчы з “ідэалагічным актывам, гістарычнай і экспертнай супольнасцю”, прысвечанай “дню народнага адзінства”, Лукашэнка даў зразумець, што пытанне аб вызваленні Пачобута разглядалася, але было знята.

ПКТ — спецыяльнае памяшканне, у якім утрымліваюцца асуджаныя ў якасці пакарання за злосныя парушэнні ўстаноўленага парадку.

У ПКТ асуджаныя маюць права штомесяц расходаваць на набыццё прадуктаў харчавання і прадметаў першай неабходнасці грашовыя сродкі, якія ёсць на іх асабовых рахунках у памеры 1 базавай велічыні (42 руб.); атрымліваць 1 бандэроль на працягу 6 месяцаў; здзяйсняць штодзённы шпацыр працягласцю 30 хвілін.

У час утрымання ў ПКТ харчаванне непрацуючых асуджаных ажыццяўляецца па зніжаных нормах.