У Латвіі зноў выяўленыя паветраныя шары з кантрабанднымі беларускімі цыгарэтамі

8 кастрычніка, Позірк. Латвійскія памежнікі 7 кастрычніка пры садзейнічанні супрацоўнікаў паліцыі выявілі ў памежным з Віцебскай вобласцю Краслаўскім краі паветраны шар з кантрабанднымі беларускімі цыгарэтамі, паведаміла Дзяржаўная памежная ахова.

Адзначаецца, што да метэазонду было прывязана 30 тыс. цыгарэт “NZ Gold” з беларускімі акцызнымі маркамі.

Супрацоўнікі паліцыі распачалі крымінальную справу за незаконны абарот тытунёвых вырабаў у буйным памеры.

Паведамляецца, што 3 кастрычніка памежнікі ў Аўгшдаўгаўскім краі, які таксама мяжуе з Віцебскай вобласцю, выявілі паветраны шар з кантрабанднымі 28.760 цыгарэтамі “Queen Super Slims” з беларускімі акцызнымі маркамі.

Метэазонды выкарыстоўваюцца таксама пры кантрабандзе беларускіх цыгарэт у Польшчу і Літву, пры гэтым дастаўка грузу паветраным шляхам значна залежыць ад кірунку і хуткасці ветру.