9 кастрычніка, Позірк. “Геапалітычныя прычыны нарастання міжнароднай напружанасці” пералічыў намеснік начальніка факультэта Генеральнага штаба УС Ваеннай акадэміі Беларусі Андрэй Багадэль падчас сустрэч з вайскоўцамі і грамадзянскім персаналам Брэсцкага гарнізона, 72‑га гвардзейскага Аб’яднанага навучальнага цэнтра і кіравання Паўночна-Заходняга аператыўнага камандавання (Барысаў, Мінская вобласць), паведамляе прэс-служба Мінабароны.
“Сярод іх ён вылучыў з’яўленне новых цэнтраў сілы — Расіі, Кітая, Глабальнага Поўдня”, — гаворыцца ў рэлізе (арфаграфія захавана).
Багадзель названы “прадстаўніком ідэалагічнага актыву Рэспублікі Беларусь”.
Палкоўнік актыўна прыцягваецца дзяржСМІ для каментавання падзей, вядомы прарасійскай і антыўкраінскай пазіцыяй.
Заяўляў, у прыватнасці, аб тым, што беларуская мова нібыта з’яўляецца “гаворкай” рускай, налічыў ва Украіне “чатыры войны адначасова”, пагражаў Польшчы прымяненнем ядзернай зброі і называў краіны “калектыўнага Захаду” ў ліку найбольш небяспечных для Беларусі.
Традыцыйная для Масквы і Мінска рыторыка прадугледжвае абвінавачанне Захаду ў распальванні ўкраінскай вайны, у якой улады Беларусі падтрымліваюць Крэмль.
