Апублікавана на адкрытай версіі “Позірку” 12 кастрычніка 2025 года ў 14:35
11 кастрычніка, Позірк. На сайце Брэсцкай абласной філармоніі рэкламуецца запланаваны на 25 кастрычніка ў Брэсце канцэрт расійскага рэпера Kamazz (Дзяніс Разыскул), якога не пусцілі ўлады Літвы і Эстоніі за выступы на акупаванай тэрыторыі Украіны і ў Крамлі.
43-гадовы ўраджэнец Астрахані павінен быў даць канцэрты 3 кастрычніка ў Вільнюсе і 4 кастрычніка ў Нарве.
Дэпартамент міграцыі МУС Літвы задаволіў адпаведную просьбу МЗС краіны і Форуму свабоднай Расіі (ФСР, месціцца ў Вільнюсе). Гэтак жа паступіла МУС Эстоніі, якое атрымала ліст ад ФСР.
У раскладзе Разыскула на канец кастрычніка, лістапад і пачатак снежня тры паездкі ў Беларусь на 18 канцэртаў. У канцы кастрычніка акрамя Брэста (пляцоўкай названы клуб “Медуза”) ён збіраецца выступіць у Баранавічах (24-га) і Кобрыне (26-га).
