За тры кварталы МАЗ прадаў на расійскім рынку ў 1,8 раза менш новых грузавікоў, чым годам раней
14 кастрычніка, Позірк. У верасні 2025 года на расійскім рынку прададзены 231 новы грузавік Мінскага аўтамабільнага завода — на 31,2% менш, чым за той жа месяц 2024-га (336), гаворыцца ў даследаванні “АСМ-холдынг” (РФ).
Прадукцыя МАЗа ў мінулым месяцы заняла 5-е месца ў спісе самых прадаваных брэндаў гэтага сегмента аўтарынка Расіі, канстатавалі эксперты (у студзені, лютым і сакавіку было 6-е, у красавіку прадпрыемства дзяліла 5–6-е, траўні — 4-е, чэрвені, ліпені і жніўні — 7-е). Доля на рынку склала 5% (у жніўні — 4,3%).
Лідарамі продажаў у справаздачным месяцы сталі: КамАЗ — 1.351 (-17% да верасня 2024-га), SHAANXI — 655 (-55,6%), FAW — 359 (-58%).
За дзевяць месяцаў 2025 года беларускае прадпрыемства рэалізавала на рынку РФ 2.260 грузавікоў (4.095; -44,8%, падзенне ў 1,8 раза).
За мінулы год беларускае прадпрыемства збыло ў РФ 5.719 адзінак гэтай тэхнікі (за 2023-ы — 6.406; -10,7%).
Пяцёрка лідараў продажаў па выніках 2024 года: КамАЗ (23.121; -26,5% да ўзроўню продажаў 2023-га), SITRAK (19.376; -19,2%), Shacman (15.545; -25,6%), FAW (11.680; -26,3%), Dongfeng (9.990; рост у 2,1 раза).
Буйныя прамысловыя прадпрыемствы — БелАЗ, БМЗ, МТЗ, МАЗ, а таксама канцэрны “Белнафтахім” і “Беллеспаперапрам” не выканалі заданні па пастаўках прадукцыі ў Расію. Пра гэта, паводле паведамлення беларускай амбасады ў Маскве, ішла гаворка 10 верасня на пасяджэнні міжведамаснай рабочай групы па ажыццяўленні маніторынгу сітуацыі з пастаўкамі ў РФ.
“Нягледзячы на станоўчую дынаміку тэмпаў росту экспарту, адзначаныя негатыўныя тэндэнцыі па асобных таварных групах, невыкананне экспартных заданняў асобнымі дзяржаўнымі органамі і прадпрыемствамі”, — гаварылася ў прэс-рэлізе.
Лукашэнка 31 ліпеня гэтага года на нарадзе з кіраўнікамі беларускіх дыпламатычных прадстаўніцтваў выказаў незадаволенасць тым, што на расійскі рынак “пранікаюць тавары з трэціх краін без усялякай лакалізацыі”, выцясняючы беларускую прадукцыю.
15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер з-за актыўнай экспансіі кітайскіх вытворцаў”.
