У Гомельскай вобласці сілавікі абследавалі больш за 72 тыс. га ў пошуках дронаў, якія зваліліся

14 кастрычніка, Позірк. На просьбу кіраўніка Гомельскай вобласці Івана Крупко ў рэгіёне сфармаваныя групы з міліцыянтаў і вайскоўцаў, якія ўжо абследавалі больш за 72 тыс. га зямельных угоддзяў на прадмет падзення беспілотных лятальных апаратаў, заявіў міністр унутраных спраў Іван Кубракоў 14 кастрычніка на нарадзе ў абласным цэнтры аб бяспецы “на памежных тэрыторыях“.

Паводле сцвярджэння кіраўніка МУС, грамадска-палітычнае становішча ў свеце і вакол Беларусі, у прыватнасці на яе паўднёвых рубяжах, “патрабуе <…> пастаяннай гатоўнасці асабістага складу [міліцыі] да выканання задач у асаблівых умовах, сістэмнай працы па апярэджанню выклікаў і пагроз, якія ўзнікаюць“.

Неабходны “аператыўны абмен інфармацыяй паміж падраздзяленнямі сілавога блока, у тым ліку ўнутры калектываў, і ўдасканалення службовай дзейнасці спецпадраздзяленняў, іх тэхнічнага абсталявання, а таксама развіцця сістэм відэаназірання ў населеных пунктах“, лічыць ён.

Кубракоў распарадзіўся “перагледзець структуру вайсковай часці 5525 (6-я асобная спецыяльная міліцэйская брыгада ўнутраных войскаў МУС; дыслакуецца ў Гомелі і Мазыры, — “Позірк“.) і, пры неабходнасці, падрыхтаваць хадайніцтва аб унясенні змяненняў ва ўказ аб Унутраных войсках“.

Прадстаўнікі ўладаў звычайна не паведамляюць пра выпадкі ўварвання БПЛА, якія, як правіла, залятаюць у Беларусь падчас узаемных паветраных нападаў Расеі і Украіны. Зрэдку прызнаюць такія факты-тады, калі інфармацыя пра гэта з’яўляецца ў сацыяльных сетках і незалежных СМІ. Так было, у прыватнасці, у выпадку са знішчэннем дронаў над Гомелем у верасні 2024 года і падзеннем беспілотніка ў спальным раёне Мінска ў ліпені 2025-га.

16 жніўня камандуючы Ваенна-паветранымі сіламі і войскамі супрацьпаветранай абароны Андрэй Лук’яновіч заявіў, што з пачатку 2025 года ў Беларусі зафіксавалі больш за 800 парушэнняў правілаў выкарыстання паветранай прасторы.

“У тым ліку больш за тры сотні парушэнняў дзяржаўнай мяжы нашай краіны, — цытавала военачальніка прэс-служба Міністэрства абароны. — У асноўным гэта беспілотныя лятальныя апараты, якія парушаюць мяжу, на жаль, на паўднёвых рубяжах, таму што там абстаноўка няпростая“.

8 кастрычніка дзяржсакратар Савета бяспекі Аляксандр Вальфовіч пасля дакладу Аляксандру Лукашэнку заявіў дзяржСМІ: Мінск “фіксуе, што кожныя суткі Расія і Украіна ўжываюць на сваёй тэрыторыі вялікую колькасць беспілотных лятальных сродкаў”.

Мінск падтрымлівае Маскву ў развязанай ёю ў 2022 годзе поўнамаштабнай вайне супраць Украіны.