Малы бізнес паказаў найбольшую гнуткасць ва ўмовах санкцый — Мінэканомікі

15 кастрычніка, Позірк. “У апошнія гады, калі перажываем санкцыйны ціск, менавіта суб’екты малога прадпрымальніцтва паказалі найбольшую гнуткасць, дынамічнасць у пошуках новых партнёраў, <…> новых лагістычных шляхоў”, — заявіла дырэктар дэпартамента па прадпрымальніцтве Міністэрства эканомікі Вольга Русіновіч у інтэрв’ю “Першаму інфармацыйнаму тэлеканалу” 14 кастрычніка.

Паводле яе сцвярджэння, у параўнанні з буйным бізнесам “значна прасцей маленькаму прадпрыемству перабудавацца і знайсці новых контрагентаў”.

На малое і сярэдняе прадпрымальніцтва прыпадае больш як 25% ВУП, паведаміла прадстаўнік ведамства.

Паводле Русіновіч, 20% аб’ёмаў прамысловай вытворчасці, амаль трэць рознічнага гандлю і больш як палавіна тавараабароту грамадскага харчавання таксама прыпадае на малы і сярэдні бізнес. Яго доля ў экспарце тавараў перавышае 43%, у экспарце паслуг — 60%.

У 2024 годзе зарэгістравана 13 тыс. новых малых камерцыйных арганізацый, а іх агульная колькасць дасягнула гістарычнага максімуму — 129 тыс. У 2025 годзе колькасць юрыдычных асоб павялічылася на 9 тыс., сказала чыноўнік.

За мінулыя пяць гадоў дзяржава ў рамках розных праграм аказала прадпрымальнікам падтрымку на суму 49 млрд рублёў, удакладніла кіраўнік дэпартамента.

Па выніках студзеня — чэрвеня 2025 года ў Беларусі налічвалася 229.530 індывідуальных прадпрымальнікаў (ІП) — на 6,3% менш, чым паводле вынікаў аналагічнага перыяду 2024-га (245.089), сведчыць праведзены “Позіркам” аналіз даных Нацыянальнага статыстычнага камітэта.

На канец першага першага паўгоддзя ў краіне было зарэгістравана 159.270 (153.401; 3,8%).

22 красавіка 2024 года Аляксандр Лукашэнка падпісаў закон па пытаннях прадпрымальніцкай дзейнасці.

Дакументам прадугледжаны дзве катэгорыі, якія займаюцца прадпрымальніцкай дзейнасцю: юрыдычныя і фізічныя асобы.

Да юрыдычных асоб аднесены малыя арганізацыі з колькасцю працуючых да 100 чалавек, сярэднія — да 250 і буйныя — звыш 250, да фізічных асоб – рамеснікі, уладальнікі аграэкасядзіб, самазанятыя, індывідуальныя прадпрымальнікі.

Асноўныя яго палажэнні ўступілі ў сілу 1 кастрычніка мінулага года.

Для ІП, чые віды эканамічнай дзейнасці не ўключаны ў новы пералік, устаноўлены пераходны перыяд з 1 кастрычніка 2024 года да 31 снежня 2025 года. У гэты тэрмін прадпрымальнікі павінны перарэгістроўвацца ў камерцыйныя арганізацыі па спрошчанай працэдуры, выконваючы патрабаванні заканадаўства.

Каля паловы прадпрымальнікаў на гэты момант гэта зрабілі, удакладніла Русіновіч.