Літоўскія ўлады часова вярнулі Ціханоўскай ахову

17 кастрычніка, Позірк. Літоўскія ўлады часова вярнулі Святлане Ціханоўскай ахову, паведамляе партал LRT са спасылкай на дарадцу дэмакратычнага лідара па дыпламатычных пытаннях Дзяніса Кучынскага.

“Учора (16 кастрычніка. — “Позірк”.) нам была вернутая часовая ахова ад службы аховы кіраўніцтва [краіны], пакуль будзе створаная новая сістэма бяспекі. Таксама мы аднавілі працу нашага офіса. Спадзяёмся, што знойдзем далейшыя супольныя рашэнні для працягнення працы ў Літве”, — сказаў Кучынскі.

Паводле яго слоў, незалежна ад абставін і рашэнняў Літвы беларусы заўсёды будуць удзячныя ёй за падтрымку іх барацьбы і за прыём у сябе. “Наша задача — вярнуць свабоду Беларусі, вярнуцца дадому і быць надзейным суседам для Літвы”, — заявіў дарадца.

Кучынскі падкрэсліў важнасць таго, каб Літва заставалася лідарам, які падтрымлівае дэмакратычныя каштоўнасці і займае цвёрдую пазіцыю ў дачыненні да рэжыму Лукашэнкі.

17 кастрычніка літоўскі прэзідэнт Гітанас Наўседа заявіў, што з боку Вільнюса ў дачыненні да Ціханоўскай “нічога не змяняецца”, а задача яе і каманды — “ацаніць, ці хочуць яны застацца ў Літве або выбраць іншае месца”.

“Усё застаецца, як было, і спадарыня Ціханоўская застаецца госцем нашай дзяржавы. Мы сапраўды даём прытулак людзям, якіх праследуюць як апазіцыянераў”, — цытуе Наўседу партал Delfi.

7 кастрычніка стала вядома, што Літва зніжае ўзровень фізічнай аховы Ціханоўскай, якая разам з сям’ёй жыве ў літоўскай сталіцы. Афіцыйная прычына — рэвізія ступені пагроз. Шэраг літоўскіх палітыкаў раскрытыкавалі гэтае рашэнне. Экс-прэм’ер Літвы Інгрыда Шыманітэ назвала яго не тэхнічным, а палітычным.

Дзейны кіраўнік урада Інга Ругінене адзначыла, што ахова Ціханоўскай не знятая, але “скарэктаваная з улікам цяперашніх рэалій”. Паводле яе, літоўскія службы “цудоўна выконваюць сваю працу, штодзённа ацэньваючы ўзровень пагроз і мадэлюючы, якія меры бяспекі варта прымяняць на падставе гэтага”.

Кучынскі заявіў 8 кастрычніка, што праца фізічнага офіса ў літоўскай сталіцы была прыпыненая ў сувязі “са зменамі ў сістэме аховы і бяспекі”.

Экс-міністр замежных спраў Габрыэлюс Ландсбергіс назваў зніжэнне ўзроўню фізічнай аховы Ціханоўскай здрадай.

14 кастрычніка Наўседа заявіў, што сітуацыя з аховай Ціханоўскай “драматызуецца”.

На думку дэпутата, віцэ-старшыні камітэта па еўрапейскіх справах Сейма Літвы Томаса Тамілінаса, узровень аховы Ціханоўскай як абранага прэзідэнта павінен застацца ранейшым, бо “беларускі рэжым ніяк не змяніўся”.