27 кастрычніка, Позірк. Аэрапорт Вільнюса, які закрываўся ўвечары 26 кастрычніка, як было абвешчана раней, на чатыры гадзіны да 1:40 па мясцовым часе (2.40 па мінскім) 27 кастрычніка з-за чарговых зондаў, якія прыляцелі з беларускай тэрыторыі, аднавіў працу ў 4:30 (5: 30), вынікае з паведамленняў літоўскіх СМІ.
Адзначаецца, што абмежаванні закранулі амаль 50 рэйсаў: 13 было скасавана, 14 — перанакіравана, 20 — затрымана. Пацярпела больш за 7 тыс. пасажыраў.
Застаюцца закрытымі прыкладна з 22:10 26 кастрычніка абодва наземныя пункты пропуску на мяжы з Беларуссю, Мядзінінкай (з беларускага боку Каменны Лог) і Шальчынінкай (Беняконі). Апошні раз да гэтага яны зачыняліся з 22:45 25 кастрычніка да 2:00 26 кастрычніка.
Паводле звестак Дзяржпагранкамітэта Беларусі, на 8 раніцы беларускага часу (7 раніцы літоўскага) у Каменным Логу выезду чакалі 150 легкавых аўтамабіляў, 840 грузавікоў і 7 аўтобусаў, у пункце пропуску Беняконі — адпаведна 90, 740 і 0.
Раней прэзідэнт Літвы Гітанас Наўседа прапанаваў абмежаваць транзіт з Беларусі ў Калінінградскую вобласць (РФ) праз залёт у краіну аэрастатаў.
Прэм’ер-міністр Літвы Інга Ругінене анансавала пасяджэнне Камісіі па нацыянальнай бяспецы, па выніках якога 27 кастрычніка будуць прапанаваныя “канкрэтныя рашэнні” па сітуацыі з аэрастатамі. Яна ж, паводле інфармацыі літоўскіх СМІ, 26 кастрычніка заявіла, што не выключае прыняцця на пасяджэнні пастановы аб закрыцці мяжы з Беларуссю на працяглы час.
