Мінпрацы: Колькасць працоўных мігрантаў вырасла за год у паўтара раза, больш за палову з іх — грамадзяне Туркменістана і Узбекістана
29 кастрычніка, Позірк. За апошні год колькасць працоўных мігрантаў у Беларусі вырасла ў 1,5 раза, заявіла намеснік міністра працы і сацыяльнай абароны Таццяна Астрэйка.
Паводле яе слоў, якія прыводзіць прэс-служба ведамства, больш за палову працоўных мігрантаў (54%) — грамадзяне Туркменістана і Узбекістана. Таксама адзначаецца “значны рост” колькасці работнікаў з Індыі і Непала.
Пры гэтым чыноўніца звярнула ўвагу, што роўныя з беларусамі правы пры працаўладкаванні маюць грамадзяне краін ЕАЭС, куды згаданыя вышэй дзяржавы не ўваходзяць.
Паводле звестак Астрэйка, сярод працоўных мігрантаў пераважаюць мужчыны, большасць (71,7%) занятыя на працоўных прафесіях. Каля 70% замежнікаў працуюць у Мінску і Мінскай вобласці, дзе “найбольш востра адчуваецца дэфіцыт кадраў”.
28 кастрычніка стала вядома, што Мінпрацы абнавіла пералік прафесій, даступных у 2026 годзе для спрошчанага працаўладкавання замежных грамадзян. У яго ўключана 29 рабочых спецыяльнасцяў і 17 прафесій служачых.
Як адзначалася, пры прыёме на працу замежнікаў па прафесіях і на пасады, уключаныя ў пералік, “наймальніку дастаткова паведаміць орган унутраных спраў”.
У іншых выпадках працадаўцу трэба “атрымаць спецыяльны дазвол і даказаць, што заняцце свабодных працоўных месцаў (вакансій) не можа быць забяспечана грамадзянамі Беларусі і замежнікамі, якія маюць ВНЖ”.
Раней паведамлялася, што станоўчы вынік на экзамене сярод імігрантаў на веданне адной з дзяржаўных моў 30 верасня атрымала 90% удзельнікаў. У тэставанні ўзялі ўдзел 90 чалавек, якія прэтэндуюць на працаўладкаванне ў Беларусі.
Палітыку прыцягнення працоўных мігрантаў беларускія ўлады праводзяць з-за дэфіцыту работнікаў на фоне масавай эміграцыі насельніцтва па эканамічных і палітычных прычынах.
Паводле даных Парламенцкай асамблеі Савета Еўропы, ад 200 да 500 тыс. чалавек пакінула Беларусь пасля падзей жніўня 2020 года. Упраўленне вярхоўнага камісара ААН па правах чалавека называе меншую лічбу — 100 тыс.
Дэфіцыт працоўных рук у Беларусі з’яўляецца “доўгачасовым і стратэгічным выклікам як у колькасным, так і ў якасным аспектах”, заявіла ў траўні намесніца міністра эканомікі Таццяна Бранцэвіч. Яна перакананая, што на першым месцы па актуальнасці для Беларусі павінна стаяць “задача не прыцягнення новых працоўных рэсурсаў здалёку”, а ўтрыманне сваіх кадраў, а яшчэ лепш — “вяртанне суграмадзян, якія мігравалі”.
У верасні 2025 года ў беларускай эканоміцы было занята 4 млн 151 тыс. чалавек — на 5,2 тыс. менш, чым у жніўні (4 млн 156,2 тыс.; -0,13%), сведчыць праведзены “Позіркам” аналіз даных Нацыянальнага статыстычнага камітэта.
У студзені 2025 года ў эканоміцы было занята 4 млн 131,6 тыс. чалавек, у лютым — 4 млн 141 тыс., сакавіку — 4 млн 146,2 тыс., красавіку — 4 млн 135,8 тыс., траўні — 4 млн 122,1 тыс., чэрвені — 4 млн 149,7 тыс., ліпені — 4 млн 148 тыс.
Паводле даных Дзяржаўнай службы занятасці, на 29 кастрычніка на рынку працы Беларусі прапануецца 179.064 вакансіі.
