8 лістапада, Позірк. Праца аэрапорта Вільнюса прыпыненая 8 лістапада ў 20:45 (21:45 паводле мінскага часу) праз палёт у яго бок аднаго ці некалькіх падазроных аб’ектаў, паведамляе партал навін Delfi са спасылкай на Нацыянальны цэнтр кіравання крызісамі.
“Паводле папярэдніх даных, рашэнне пра абмежаванні ў паветранай прасторы было прынятае праз шар (шары), які ляціць (ляцяць) у кірунку Вільнюскага аэрапорта. Абмежаванні паветранай прасторы ўведзеныя да 23:45 (00:45 9 лістапада паводле мінскага часу. — “Позірк”.)”, — гаворыцца ў паведамленні з агаворкай, што абмежаванні могуць быць знятыя ў залежнасці ад напрамку ветру і руху аб’екта.
Напрыканцы мінулага месяца Літва сутыкнулася з неаднаразовымі выпадкамі масавага прылёту з Беларусі паветраных шароў і метэазондаў, якія выкарыстоўваюць кантрабандысты для перакідвання цыгарэт. Праз аэрастаты даводзілася прыпыняць працу аэрапорта ў Вільнюсе, што цягнула за сабой затрымку і скасаванне рэйсаў. Рэагуючы на гэта, улады Літвы некалькі разоў часова закрывалі пункты пропуску, а 29 кастрычніка ўрад вырашыў закрыць іх на больш працяглы тэрмін — да 24:00 30 лістапада (1:00 1 снежня паводле мінскага часу) з магчымасцю падаўжэння.
У адказ урад Беларусі 31 кастрычніка прыняў пастанову № 599 “Аб прымяненні спецыяльнай абмежавальнай меры”, якой забараніў зарэгістраваным у Літве грузавым аўтамабілям, цягачам, прычэпам і паўпрычэпам праязджаць праз усе пункты пропуску, за выключэннем літоўскіх.
Праз пастрожанне правіл перасячэння мяжы ў Беларусі затрымалася мноства літоўскіх фур. Улады ў Вільнюсе спрабуюць угаварыць рэжым Аляксандра Лукашэнкі дазволіць грузавікам вярнуцца на літоўскую тэрыторыю, Мінск адмаўляецца да адкрыцця мяжы з боку Літвы.
7 лістапада Лукашэнка на сустрэчы са старшынёй Дзяржпагранкамітэта Канстанцінам Моластавым “даў указанні ў дачыненні да дзеянняў беларускіх пагранічнікаў на мяжы з Літвой”. Пры гэтым іх сутнасць дагэтуль не раскрытая.
На фоне адмовы Беларусі прапусціць літоўскія фуры ў тым ліку праз “эвакуацыйны калідор”, які Вільнюс гатовы арганізаваць у пункце Шальчынінкай, дарадца літоўскага прэм’ера Ігнас Дабравольскас заявіў, што “па меры далейшай эскалацыі сітуацыі” не выключаныя “доўгатэрміновыя абмежаванні на перавозку беларускіх тавараў па чыгунцы” праз Літву. Пры гэтым ён падкрэсліў, што “на гэты час пра гэта пакуль не вядуцца размовы”.
8 лістапада МЗС Беларусі назвала беспадстаўнымі заявы прадстаўнікоў уладаў Літвы пра “забарону на вяртанне літоўскіх грузавікоў” з беларускай тэрыторыі, апелюючы да таго, што не Мінск закрыў мяжу, і заявіла, што транспарт вернецца дадому, як толькі Вільнюс “здыме абмежаванні”.
