Кіраўнікі знешнепалітычных ведамстваў Літвы і Польшчы абмеркавалі ўзмацненне ціску на рэжым Лукашэнкі

14 лістапада, Позірк. Рэгіянальная бяспека і ўстойлівасць, пагроза і падвышэнне напружанасці ў рэгіёне, што ствараюцца “гібрыднымі атакамі рэжыму ў Беларусі супраць Літвы”, абмяркоўваліся 13 лістапада ў Варшаве на сустрэчы літоўскага міністра замежных спраў Кястуціса Будрыса і яго польскага калегі Радаслава Сікорскага.

Паводле інфармацыі МЗС Літвы, на сустрэчы “былі падкрэсленыя роля Беларусі ў кантэксце вайны Расіі супраць Украіны і неабходнасць узмацнення ціску на рэжым [Аляксандра Лукашэнкі]”.

“Гэта не першы выпадак, калі Літва і Польшча сутыкаюцца з гібрыднымі атакамі мінскага рэжыму, — заявіў Будрыс. — Плыні мігрантаў працягваюць шукаць спосабы незаконнага перасячэння мяжы, а ў Літве працягваюцца парушэнні паветранай прасторы з выкарыстаннем кантрабандных паветраных шароў. Гэта свядомыя дзеянні Беларусі супраць нашых краін, скіраваныя на дэстабілізацыю нашых дэмакратычных супольнасцяў. Толькі сумесна, каардынуючы дзеянні і прытрымліваючыся адзінай пазіцыі, мы можам забяспечыць эфектыўнасць нашых захадаў”.

Сярод іншага міністры абмеркавалі ўмацаванне трансатлантычных сувязей, сітуацыю ва Украіне і яе падтрымку, супрацу ў фармаце Еўрасаюза і НАТО і “актуальныя двухбаковыя тэмы”.

Напрыканцы мінулага месяца Літва сутыкнулася з неаднаразовым масавым прылётам з Беларусі паветраных шароў і метэазондаў, якія выкарыстоўваюць кантрабандысты для перакідвання цыгарэт. Рэагуючы на ​​гэта, Вільнюс некалькі разоў часова закрываў пункты пропуску, а 29 кастрычніка літоўскі ўрад вырашыў закрыць іх на больш працяглы тэрмін — да 24:00 30 лістапада (1:00 1 снежня паводле мінскага часу) з магчымасцю падаўжэння.

У адказ урад Беларусі 31 кастрычніка прыняў пастанову № 599 “Аб прымяненні спецыяльнай абмежавальнай меры”, якой забараніў зарэгістраваным у Літве грузавым аўтамабілям, цягачам, прычэпам і паўпрычэпам праязджаць праз усе пункты пропуску, за выключэннем літоўскіх.

Праз пастрожанне правіл перасячэння мяжы ў Беларусі затрымалася крыху менш за 1,3 тыс. літоўскіх фур. Улады ў Вільнюсе спрабуюць угаварыць рэжым Лукашэнкі дазволіць грузавікам вярнуцца на літоўскую тэрыторыю праз “эвакуацыйны калідор”, Мінск адмаўляецца да адкрыцця мяжы з боку Літвы.

Пакуль сітуацыя не вырашаная, беларускія ўлады распарадзіліся змясціць літоўскія грузавікі на стаянкі ля пунктаў пропуску і арганізаваць ахову транспарта — платную. Пры гэтым кіроўцы вольныя вярнуцца ў Літву.

11 лістапада Лукашэнка даручыў міністру замежных спраў Максіму Рыжанкову арганізаваць перамовы па пытаннях “нармалізацыі сітуацыі і аднаўлення паўнацэннага функцыянавання пунктаў пропуску” на беларуска-літоўскай мяжы. Паводле сцвярджэння Лукашэнкі, ад літоўскіх уладаў паступілі прапановы аб урэгуляванні сітуацыі.

На наступны дзень прэм’ер-міністр Літвы Інга Ругінене пацвердзіла атрыманне афіцыйнай прапановы Мінска пра правядзенне перамоў аб урэгуляванні сітуацыі на мяжы.

Міністр унутраных спраў Літвы Уладзіслаў Кандратовіч заявіў, што можна “паспрабаваць урэгуляваць сітуацыю на непалітычным узроўні”, на ўзроўні памежнікаў. Кіраўнік МЗС Будрыс паслядоўна выступае супраць перамоў “на ўмовах Мінска”.

Тым часам Міністэрства ўнутраных спраў і адміністрацыі Польшчы падрыхтавала праект распараджэння міністра, у якім прапануецца 17 лістапада аднавіць працу двух цяпер закрытых пунктаў пропуску — Баброўнікі (з беларускага боку Бераставіца) і Кузніца (Брузгі).