Тыя, хто здзейснілі дыверсію на чыгунцы ў Польшчы, збеглі ў Беларусь — Туск
18 лістапада, Позірк. Дыверсію на польскай чыгунцы здзейснілі грамадзяне Украіны, якія пасля гэтага пакінулі краіну праз пункт пропуску Цярэспаль, выехаўшы ў Беларусь, заявіў прэм’ер-міністр Польшчы Дональд Туск, піша выданне Onet.
Паводле Туска, 18 лістапада ўлады вызначылі асобы тых, хто здзейсніў дыверсію: адзін з іх — грамадзянін Украіны, асуджаны Львоўскім судом у траўні гэтага года за дыверсіі ва Украіне, пражывае ў Беларусі. Другі — жыхар Данбаса, таксама трапіў у Польшчу з Беларусі восенню гэтага года.
Кіраўнік польскага ўрада падкрэсліў, што мужчыны даўно супрацоўнічаюць з расійскімі службамі. Адразу пасля здзяйснення дыверсіі, гэтыя людзі пакінулі тэрыторыю Польшчы праз памежны пераход у Цярэспалі (з беларускага боку Брэст).
Польскія службы маюць усе даныя гэтых людзей і іх выявы, паведаміў Туск.
15 лістапада ў Польшчы адбылося два інцыдэнты на чыгунцы. У нядзелю раніцай стала вядома пра няспраўнасці ў чыгуначнай інфраструктуры ў раёне населенага пункта Жычын (Мазавецкае ваяводства) ў люблінскім кірунку. Шляхі былі пашкоджаныя ў выніку выбуху выбуховай прылады, недалёка было выяўлена яшчэ адна, якая не выбухнула, паведамлялі польскія СМІ.
Другі інцыдэнт адбыўся пад Пулавамі (Люблінскае ваяводства), дзе была пашкоджана чыгуначная кантактная сетка. Высвятляецца, была яна абарваная або выразаная. У выніку інцыдэнту ў цягніку было разбіта акно.
