Беларусь і Кітай павялічаць колькасць пунктаў прызначэння на паветраных лініях

18 лістапада, Позірк. Беларусь і Кітай павялічаць колькасць пунктаў прызначэння на паветраных лініях, паведамляе Міністэрства транспарту і камунікацый. Адпаведны мемарандум даручана падпісаць авіяцыйным уладам паводле вынікаў сустрэчы міністраў транспарту дзвюх краін — Аляксея Ляхновіча і Лю Вэя.

У галіне чыгуначнага транспарту бакі “абмеркавалі курсіраванне грузавых цягнікоў праз тэрыторыю Беларусі ў напрамку Кітай — Еўропа”, гаворыцца ў рэлізе беларускага ведамства.

У прыватнасці, Ляхновіч падкрэсліў, што, “нягледзячы на часовае закрыццё чыгуначных памежных пераходаў, Беларусь не ўводзіла забаронаў, не абмяжоўвала адпраўленне цягнікоў і забяспечыла захаванасць грузаў”. Пасля адкрыцця мяжы Польшай Мінск “за некалькі дзён забяспечыў аператыўную перадачу назапашаных цягнікоў праз памежны пераход Брэст — Тэрэспаль”.

У галіне аўтамабільнага транспарту “абазначылі ўзаемную зацікаўленасць у паскарэнні ўкаранення сістэмы электроннага дазволу на міжнародныя аўтаперавозкі грузаў і разгледзелі іншыя пытанні, якія тычацца перспектыў супрацоўніцтва”.

Міністр транспарту КНР “выказаў прыхільнасць развіццю практычнага супрацоўніцтва з беларускім бокам”, сцвярджае ведамства ў Мінску.

“Беларусь з’яўляецца ключавой транзітнай краінай. Мы гатовы прыкладаць намаганні для рэалізацыі пазначаных задач у сумесным камюніке ўрадаў дзвюх краін, падпісаным у жніўні 2024 года, і садзейнічаць бесперапыннаму супрацоўніцтву ў транспартнай сферы”, — адзначыў кітайскі міністр.

Перамовы кіраўнікоў транспартных ведамстваў адбыліся на палях Другога форуму міжнароднага супрацоўніцтва ў горадзе Сіань (Кітай).