Беларускае грамадзянства нададзена 224 іншаземцам і асобам без грамадзянства з 17 краін

18 лістапада, Позірк. Беларускае грамадзянства атрымалі 224 замежныя грамадзяніны і асобы без грамадзянства, у тым ліку 16 непаўналетніх, паведамляе прэс-служба Аляксандра Лукашэнкі.

Адпаведны ўказ ён падпісаў 18 лістапада.

Новымі грамадзянамі Беларусі сталі выхадцы з 17 дзяржаў. У іх ліку — Арменія, Егіпет, Казахстан, Латвія, Малдова, Расія, Турцыя, Узбекістан.

Пры гэтым заяўляецца, што большасць з іх прыбыла з Украіны.

Паведамляецца, што асобы, якія атрымалі беларускае грамадзянства, занятыя ў розных сферах эканомікі. Сярод іх супрацоўнікі сфер адукацыі, абслугоўвання, работнікі аграпрамысловага комплексу, будаўнічай галіны.

Сярод новых грамадзян Беларусі — доктар і кандыдат навук, якія выкладаюць у “адным з вядучых беларускіх ВНУ”.

Адначасова прынята рашэнне пра адхіленне заяў на атрыманне грамадзянства “шэрагу асоб, якія парушалі законы Беларусі”.

12 ліпеня гэтага года быў падпісаны ўказ пра прыём у беларускае грамадзянства 245 чалавек, 27 сакавіка — 311 (у тым ліку 26 непаўналетніх), 26 жніўня 2024 года — 243, 11 чэрвеня 2024 года — 244.

Згодна з указам ад 21 ліпеня 2023 года № 222, асобы, якія набываюць грамадзянства, павінны клясціся быць патрыётамі Беларусі, “выконваць і паважаць” Канстытуцыю і законы агулам, “бараніць незалежнасць, суверэнітэт і тэрытарыяльную цэласнасць” Беларусі, “паважаць яе дзяржаўныя сімвалы, духоўныя, гістарычныя, культурныя і нацыянальныя традыцыі, захоўваць гістарычную памяць пра гераічнае мінулае беларускага народа”, “паважаць годнасць, правы, свабоды і законныя інтарэсы іншых асоб”.

У згаданым дакуменце таксама вызначана “працэдура ўнясення” Лукашэнкам “матэрыялаў пра пазбаўленне грамадзянства” за ўдзел у “экстрэмісцкай дзейнасці” або “прычыненне цяжкай шкоды інтарэсам Беларусі асобамі”, якія знаходзяцца за межамі краіны.

Паводле даных Парламенцкай асамблеі Савета Еўропы, ад 200 да 500 тыс. Чалавек пасля пакінулі Беларусь пасля падзей жніўня 2020 года. Упраўленне вярхоўнага камісара ААН па правах чалавека называла меншую лічбу — 100 тыс. У лютаўскім дакладзе Групы незалежных экспертаў ААН па палажэнню ў вобласці праў чалавека ў Беларусі гаварылася, што з краіны за гэты час магло з’ехаць да 600 тыс. грамадзян.