Сума наяўных грошай у абароце з пачатку года павялічылася на 17% — Нацбанк

19 лістапада, Позірк. Сума наяўных грошай у абароце (агрэгат М0) на 1 лістапада 2025 года склала 13 млрд 864,7 млн рублёў, павялічыўшыся з пачатку года на 2 млрд 8,4 млн (на 1 студзеня — 11 млрд 856,3 млн; +16,9%), паведамляе Нацыянальны банк.

Пераводныя дэпазіты з пачатку года сталі большыя на 1% — з 17 млрд 519 млн да 17 млрд 694,2 млн.

Наяўныя грошы ў абароце і пераводныя дэпазіты ў нацыянальнай валюце (М1) павялічыліся на 7,4% — з 29 млрд 375,3 млн да 31 млрд 559 млн.

Грашовая маса ў нацыянальным вызначэнні (М2) павялічылася з 52 млрд 222,1 млн да 58 млрд 179,6 млн (+11,4%), рублёвая грашовая маса (М2*) — з 53 млрд 991,5 млн да 60 млрд 839,3 млн (+12,7%), шырокая грашовая маса (М3) — з 88 млрд 750,4 млн да 96 млрд 97,3 млн (+8,3%).

За 2024 год агрэгат М0 вырас на 25,1% (за 2023-ы — на 37,44%), М1 — на 19,9% (33,85%), М2 — на 34,28% (29,8%), М2* — на 28,6% (34,73%), М3 — на 17,3% (23,56%).

Нацыянальны банк Беларусі “фактычна губляе статус аўтаномнага органа і ўсё ў большай ступені падпарадкоўваецца цяперашнім інтарэсам выканаўчай улады”, гаворыцца ў бюлетэні “Экспертны погляд” у рамках праекта “Маніторынг эканомікі Беларусі” даследчага цэнтра BEROC.

Аўтар даследавання “Інстытуцыянальнае паслабленне Нацбанка і наступствы для цэнавай і макраэканамічнай палітыкі” старшы навуковы супрацоўнік BEROC Анатоль Харытончык канстатаваў, што “зрух фокусу манетарнай палітыкі ад цэнавай стабільнасці да адміністрацыйнай падтрымкі росту ВУП узмацняе перагрэў эканомікі, аслабляе інстытуцыйныя асновы развіцця і павышае ўразлівасць перад знешнімі шокамі”.

7 жніўня 2024 года Раман Галоўчанка, які займаў на той момант пасаду прэм’ер-міністра, заявіў, што “так званыя эксперты палохаюць перагрэвам эканомікі”. “З таго боку ўсе эканамічныя навіны падаюцца выключна ў негатыўным ключы, разлічваючы на людзей, якія не вельмі разбіраюцца ў эканамічных мадэлях”, — сказаў ён.

Паводле яго сцвярджэння, у эканоміцы “магло б быць яшчэ больш грошай”, але пакуль урад “не бачыць патрэбы ў дадатковай крэдытнай падтрымцы банкаўскай сістэмы”.

Аляксандр Лукашэнка 10 сакавіка прызначыў Галоўчанку старшынёй праўлення Нацыянальнага банка.

Эканоміка Беларусі пры адсутнасці моцных знешніх шокаў “працягне функцыянаваць у стане перагрэтага залішняга ўнутранага попытуч”, вынікае з агляду манетарнага асяроддзя за другі квартал 2025 года, прадстаўленага даследчым цэнтрам BEROC.

На думку экспертаў, “гэта будзе суправаджацца высокай [гадавой] інфляцыяй”, якая “можа наблізіцца да верхняй мяжы дыяпазону 7–9% да канца бягучага года”.

Аналітыкі адзначаюць, што “нежаданне Нацбанка надаваць манетарнай палітыцы ўмераную жорсткасць азначае, што грашова-крэдытныя ўмовы не будуць спрыяць хуткай нейтралізацыі назапашаных дысбалансаў у эканоміцы”.

Заява Галоўчанкі аб тым, што цяпер няма перадумоў для павышэння стаўкі рэфінансавання, выглядае дзіўна, такое меркаванне выказаў Харытончык на прэс-канферэнцыі 12 жніўня.

Эксперт нагадаў, што перад павышэннем у чэрвені стаўкі рэфінансавання кіраўнік рэгулятара “казаў прыкладна тое ж самае”, што стаўка “знаходзіцца на прымальным узроўні і няма прычын для яе павышэння”.

“Ну і пасля тых заяў ніякіх новых звестак, увогуле, не з’явілася, а стаўка павысілася. Таму да гэтых заяваў трэба ставіцца кансерватыўна”, — лічыць прадстаўнік даследчага цэнтра.

Гл. таксама:

Пратэрмінаваная запазычанасць прадпрыемстваў за год вырасла амаль на чвэрць

Запазычанасць фізічных асоб па спажывецкіх крэдытах за год вырасла амаль на 27% (падрабязна)