Пакістанская кампанія прапануе некваліфікаваным рабочым працаўладкаванне ў Беларусі з заробкам вышэй, чым на будоўлі
Пакістанскія рабочыя ў ААЭ
21 лістапада, Позірк. Пакістанская кампанія R.B.S. Brothers у горадзе Равалпіндзі шукае суграмадзян, якія жадаюць папрацаваць у Беларусі ў якасці некваліфікаваных рабочых, прапануючы заробак у памеры 2.500 беларускіх рублёў (каля 850 долараў), вынікае з інфармацыі Бюро эміграцыі і працаўладкавання за мяжой урада гэтай паўднёваазіяцкай краіны.
З 18 лістапада, калі была размешчаная абвестка, 4 з 6 вакансій ужо запоўненыя.
Акрамя таго, ужо занята 45 з 50 вакансій работнікаў у сферы перапрацоўкі рыбы і морапрадуктаў у Брэсце (верагодна, гаворка пра прадпрыемства “Санта Брэмар”) з заробкам 500 долараў, якія прапануе кампанія American International (таксама Равалпіндзі).
У горадзе Лахор па-ранейшаму працягваецца пошук ахвочых папрацаваць у Беларусі па 16 будаўнічых спецыяльнасцях (па адзінаццаці з іх заробак складае 600 долараў, па пяці — 1.800 беларускіх рублёў, або каля 610 долараў паводле актуальнага курсу). Колькасць вакансій па іх, як было паказана раней, вагаецца ад 5 да 15. Мяркуючы з інфармацыі на сайце, попыту на гэты від работ не назіраецца.
11 красавіка Аляксандр Лукашэнка па выніках сустрэчы ў Мінску з кіраўніком урада Пакістана Шахбазам Шарыфам заявіў, што краіны дамовіліся выпрацаваць механізм прыезду ў Беларусь пакістанскіх працоўных мігрантаў. Паводле яго слоў, Беларусь гатовая прыняць 100–150 тыс. спецыялістаў.
Гэтыя планы выклікалі неадназначную рэакцыю ў грамадстве, якая, у сваю чаргу, выклікала раздражненне ў беларускіх уладаў.
“Зацікаўленыя” хочуць “ўзрушыць беларускае грамадства” праблемай мігрантаў, у прыватнасці тэмай прыезду ў Беларусь работнікаў з Пакістана, заявіў Лукашэнка 25 красавіка на нарадзе пра развіццё раёнаў Гомельскай вобласці, што пацярпелі ў выніку выбуху на Чарнобыльскай АЭС.
Міністэрства ўнутраных спраў адрапартавала пра выяўленне “актыўных правакатараў, што наўмысна спрабавалі нагнятаць абстаноўку ў краіне і маніпуляваць грамадскай думкай”, распаўсюджваючы інфармацыю пра ўезд у Беларусь 150 тыс. грамадзян Пакістана.
Звязаны з сілавікамі тэлеграм-канал апублікаваў відэазапіс з затрыманымі за каментарыі і ролікі ў “ЦікТоку” 18-гадовым хлопцам і 20-гадовай дзяўчынай. Маладыя людзі выбачаліся на камеру за “распаўсюд фэйкаў” і “гнеўныя каментарыі на адрас жыхароў цудоўнай краіны Пакістана”.
14 жніўня Лукашэнка ў віншаванні прэм’ер-міністру Пакістана з Днём незалежнасці нагадаў яму пра “накіраванне пакістанскіх кваліфікаваных спецыялістаў для працы ў Беларусь”.
5 лістапада стала вядома, што Палата прадстаўнікоў у двух чытаннях ратыфікавала падпісанае 11 красавіка ў Мінску беларуска-пакістанскае пагадненне аб рэадмісіі. Яно прадугледжвае абавязацельства Беларусі і Пакістана на запыт другога боку прымаць уласных грамадзян, якія “ўехалі або знаходзяцца на тэрыторыі дзяржавы запытальнага боку з парушэннем заканадаўства гэтай дзяржавы па пытаннях уезду, выезду і знаходжання замежных грамадзян і асоб без грамадзянства”.
14 лістапада паведамлялася, што амбасадар Польшчы ў Пакістане Мацей Пісарскі выказаў занепакоенасць з нагоды трафікінга (гандаль людзьмі, уключаючы вярбоўку, перавозку, укрывальніцтва) з Беларусі ў еўрапейскія краіны, у т.л. Польшчу.
