Лукашэнка паскардзіўся на нястачу маладых навукоўцаў у Беларусі

21 лістапада, Позірк. Пры прызначэнні Уладзіміра Караніка старшынёй прэзідыума Нацыянальнай акадэміі навук той паабяцаў, што да 1 студзеня 2026 года “асноўныя завалы і праблемныя пытанні” ва ўстанове “будуць вырашаныя”, заявіў Аляксандр Лукашэнка 21 лістапада на нарадзе па пытаннях развіцця навуковай сферы і дзейнасці НАН.

“Магу сказаць, што пакуль сур’ёзнага такога паскарэння ў гэтым напрамку не назіраецца”, — цытуе Лукашэнку яго прэс-служба.

“На сёння пытанне пытанняў — натуральнае старэнне навуковых кадраў, асабліва ў фундаментальных напрамках, — адзначыў ён. — Мы можам павялічыць фінансаванне, пабудаваць новыя будынкі і лабараторыі, аснасціць іх самым перадавым абсталяваннем. Але павінны памятаць пастаянна: хто там будзе працаваць?”

Паводле слоў Лукашэнкі, маладых навукоўцаў у краіне — “прыблізна адна траціна (хтосьці кажа каля 40%)”.

“Маецца сапраўдны правал па навукоўцах ва ўзроставай катэгорыі 40–50 гадоў. Нам патрэбна пераемнасць”, — дадаў аратар.

Ён звярнуў увагу, што “любыя веды і тэхналогіі састарваюцца”, пры гэтым “навуковыя школы, падсілкаваныя інтэлектам маладых, — гэта свайго роду вечны рухавік”.

“Я ўжо неаднаразова гаварыў: кожны з вас, перш за ўсё дактары, прафесары, членкоры, акадэмікі, павінен рыхтаваць сабе змену”, — сказаў Лукашэнка.

У кожнага доктара і кандыдата навук, на яго думку, павінны быць “вучні-паслядоўнікі”, з сённяшняга дня гэта — “не толькі мера асабістага поспеху вучонага, які адбыўся, але і яго прафесійная прыдатнасць”.

“Павінна быць змычка досведу і маладосці. А што мы маем? Колькасць даследчыкаў вышэйшай навуковай кваліфікацыі зніжаецца, у асобных галінах ужо наблізілася да ніжняй мяжы прымальнага ўзроўню. Яе далейшае скарачэнне можа выклікаць крытычнае падзенне ўзроўню кампетэнтнасці асобных арганізацый і навуковай сферы ў цэлым і стаць перашкодай на шляху мадэрнізацыі эканомікі”, — падкрэсліў палітык.

Лукашэнка прызначыў Караніка старшынём прэзідыума НАН 22 траўня. На той момант чыноўнік займаў пасаду намесніка прэм’ер-міністра. На чале Акадэміі навук ён змяніў Уладзіміра Гусакова, які ачольваў НАН з кастрычніка 2013 года.

Лукашэнка рэгулярна крытыкуе працу НАН. 5 жніўня ён заявіў аб недастатковай эфектыўнасці працы ўстановы, паведаміўшы аб намеры да канца года сустрэцца з “навуковай грамадскасцю” і “абмеркаваць праблемы развіцця навукі”.