21 лістапада, Позірк. Былому палітвязню, лідару Аб’яднанай грамадзянскай партыі Мікалаю Казлову сабралі 4 тыс. еўра на першасныя патрэбы пасля вымушанай эміграцыі.
На сайце фонду салідарнасці BySol, які абвясціў пра пачатак збору 30 кастрычніка, указана, што на 21 лістапада экс-палітвязню пералічана 4.050 еўра (на 50 еўра больш за заяўленую суму).
Як адзначалася, сродкі Казлову патрэбныя на арэнду жылля на некалькі месяцаў (2.500 еўра), а таксама на бытавыя выдаткі, лекі і ежу (1.500).
Пра тое, што Казлоў пакінуў Беларусь, паведамлялася 17 кастрычніка. Цяпер ён знаходзіцца ў Бельгіі.
22 ліпеня 2024 года стала вядома, што ён выйшаў на волю, адбыўшы тэрмін зняволення паводле палітычна матываванай крымінальнай справы.
3 лістапада 2022 года Казлоў быў асуджаны на 2,5 года пазбаўлення волі паводле арт. 342 КК (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх) — за ўдзел у пратэсным маршы 23 жніўня 2020-га.
15 жніўня 2023 года Вярхоўны суд задаволіў пазоў Міністэрства юстыцыі і ліквідаваў АГП. Фармальнай прычынай стала тое, што партыя — насуперак абноўленаму заканадаўству — не падала дакументы на перарэгістрацыю.
Разам з тым палітычная структура працягвае дзейнасць, у прыватнасці за мяжой. Выконваючым абавязкі старшыні АГП з’яўляецца Уладзімір Шанцаў, які знаходзіцца за межамі Беларусі.
На сёння 58-гадовы Казлоў 17 гадоў працаваў у міліцыі. Звольніўся ў 2008 годзе на знак пратэсту супраць фальсіфікацый падчас мясцовых выбараў.
