На ўскраіне Мінска знойдзена цела 11-гадовай дзяўчынкі

22 лістапада, Позірк. Цела 11-гадовай дзяўчынкі “з прыкметамі падзення з вышыні” знойдзена ўдзень 22 лістапада ў сталіцы ля дома № 4 па вул. Ауэзава (мікрараён Чыжоўка-4), паведамляе агенцтва “Мінск-Навіны” са спасылкай на Следчы камітэт.

На месцы здарэння працавала следча-аператыўная група. Абставіны і прычыны высвятляюцца, пакуль пра іх казаць заўчасна, падкрэсліў СК.

Напярэдадні ведамства паведаміла пра пажар у прыватным жылым доме ў аграгарадку Аўсянка (Горацкі раён Магілёўскай вобласці), у выніку якога пацярпела двое дзяцей (2 і 3 гады). На момант узгарання яны былі дома адныя — маці пайшла забраць старэйшых дзяцей са школы.

Малалетніх, якіх вынес з дома ў агні сусед, шпіталізавалі ў цяжкім стане з прыкметамі атручэння чадным газам.