В Магілёўскай вобласці на мінулым тыдні ў ДТЗ загінулі два чалавекі

25 лістапада, Позірк. На мінулым тыдні ў Магілёўскай вобласці ў выніку трох дарожна-транспартных здарэнняў два чалавекі загінулі, адзін атрымаў цяжкія траўмы, паведамляе Следчы камітэт.

Адзначаецца, што ва ўсіх выпадках прычынай стала грэбаванне правіламі дарожнай бяспекі.

Раніцай 18 лістапада ў Слаўгарадзе 66-гадовая жанчына пераходзіла вул. Калініна ў неўстаноўленым для пераходу месцы і трапіла пад колы аўтобуса МАЗ. Пенсіянерка з цяжкімі траўмамі была шпіталізавана.

Увечары 20 лістапада ў Горацкім раёне 26-гадовы кіроўца аўтамабіля УАЗ збіў 61-гадовую мясцовую жыхарку, якая пераходзіла праезную частку ў неўстаноўленым месцы. Жанчына памерла ад атрыманых траўм.

Увечары 22 лістапада ў в. Мікалаеўка-1 Магілёўскага раёна загінуў 63-гадовы мужчына, які трапіў пад колы мікрааўтобуса Mercedes-Benz Sprinter.

У дачыненні да кіроўцаў тэрытарыяльнымі аддзеламі Следчага камітэта распачатыя крымінальныя справы паводле ч. 2 арт. 317 Крымінальнага кодэкса (парушэнне правілаў дарожнага руху, якое пацягнула праз неасцярожнасць смерць чалавека альбо прычыненне цяжкага цялеснага пашкоджання).

Як раней паведамляў СК, у першай палове гэтага года ў Беларусі зафіксавана змяншэнне колькасці дарожна-транспартных здарэнняў і пацярпелых у іх людзей, аднак узрасла колькасць загінулых. Значны рост колькасці ДТЗ назіраецца ў Гомельскай вобласці, загінулых — у Мінску, а параненых — у Мінскай вобласці. Дакладныя лічбы не называліся.

Начальнік галоўнага ўпраўлення ДАІ Міністэрства ўнутраных спраў Віктар Ротчанкаў 21 кастрычніка паведаміў, што ў 2024 годзе ў ДТЗ у Беларусі загінулі 434 чалавекі.

Праведзены “Позіркам” аналіз даных Белстата паказаў, што ў дарожна-транспартных здарэннях на тэрыторыі Беларусі ў 2024 годзе загінула 22 дзіцяці — на 57,1% больш, чым за 2023-й (14).

Толькі ў Мінску, згодна з афіцыйнымі данымі, не было зафіксавана падобных трагедый. У Мінскай вобласці іх колькасць зменшылася з 7 да 3. У іншых рэгіёнах колькасць такіх выпадкаў узрасла: у Брэсцкай вобласці — з 2 да 4, Віцебскай — з 2 да 5, Гомельскай — з 2 да 3, Гродзенскай — з 1 да 2, Магілёўскай — з 0 да 5.