Пытанне павышэння пенсійнага ўзросту пакуль не разглядаецца — Сергеенка

25 лістапада, Позірк. Пытанне павышэння пенсійнага ўзросту ў Беларусі “пакуль не разглядаецца”, заявіў старшыня Палаты прадстаўнікоў Нацыянальнага сходу (ПП НС) Ігар Сергеенка 26 лістапада на сустрэчы з прадстаўнікамі працоўнага калектыву Гомельскага домабудаўнічага камбіната.

Паводле яго слоў, якія перадае прэс-служба ПП НС, тэма павышэння ўзросту выхаду на пенсію не абмяркоўваецца “ні ў Палаце прадстаўнікоў, ні ва ўрадзе”.

15 лістапада 2024 года, выступаючы ў парламенце, міністр працы і сацыяльнай абароны Наталля Паўлючэнка заявіла, што на парадку дня ўлады пытання аб павышэнні пенсійнага ўзросту няма.

“Цяпер мы бачым і чуем, што ў шэрагу краін Садружнасці Незалежных Дзяржаў абмяркоўваюцца пытанні далейшага павышэння пенсійнага ўзросту. Для нашых жа грамадзян не плануецца”, — сказала яна.

Парог выхаду на пенсію ў 58 гадоў для жанчын і 63 гады для мужчын устаноўлены ў Беларусі, Кыргызстане, Таджыкістане і Расіі (у РФ парог паступова павышаецца — да 60 і 65 гадоў адпаведна да 2028 года).

Ва Узбекістане ўзрост выхаду на пенсію складае 55 гадоў у жанчын і 60 гадоў у мужчын, у Малдове — 61 і 63 гады (законам, прынятым у 2021 годзе, прадугледжана паступовае павышэнне пенсійнага ўзросту для жанчын да пенсійнага ўзросту мужчын), у Казахстане — таксама 61 і 63 (з 2028 года пенсійны ўзрост жанчын пачне павышацца штогод на 6 месяцаў да дасягнення 63 гадоў).

У Арменіі мужчыны і жанчыны могуць сысці на адпачынак, дасягнуўшы 63 гадоў, пры наяўнасці страхавога стажу 25 гадоў, у Азербайджане парог складае 63 гады для жанчын (на працягу бліжэйшых гадоў ён будзе павялічвацца штогод на 6 месяцаў, пакуль не складзе 65 гадоў) і 65 у мужчын.

11 красавіка 2016 года Аляксандр Лукашэнка падпісаў указ № 137 “Аб удасканаленні пенсійнага забеспячэння”, які ўступіў у сілу 1 студзеня 2017 года. Дакумент прадугледжваў паэтапнае штогадовае павышэнне на 6 месяцаў пенсійнага ўзросту для мужчын з 60 да 63 гадоў, для жанчын — з 55 да 58.