Ціханоўская абмеркавала з прэзідэнтам Бундэстага “намаганні па вызваленні палітвязняў”

26 лістапада, Позірк. “Намаганні па вызваленні палітвязняў” абмеркавала ў Берліне на сустрэчы з прэзідэнтам Бундэстага Юліяй Клёкнер дэмакратычны лідар Святлана Ціханоўская, паведамляе яе прэс-служба.

Адзначаецца, што палітык падзякавала Клёкнер за “асабістую ўвагу да беларускай тэмы і за нязменную салідарнасць Германіі з беларускім народам”.

“Святлана Ціханоўская распавяла пра актуальную палітычную сітуацыю ў Беларусі — працяг рэпрэсій, абмежаванні для незалежных журналістаў, культурных ініцыятыў і арганізацый грамадзянскай супольнасці. Асобна адзначыла маштаб беларускай дыяспары ў Германіі і яе значны ўклад у падтрымку беларускай культуры і прасоўванне дэмакратычных каштоўнасцяў”, — гаворыцца ў паведамленні.

Таксама Ціханоўская падзякавала прэзідэнту Бундэстага за “падтрымку ініцыятывы стварэння парламенцкай групы “За дэмакратычную Беларусь”, запуск якой запланаваны падчас візіту дэмлідара ў Берлін.

Паводле слоў Ціханоўскай, група стане “важнай пляцоўкай для сістэмнай, доўгатэрміновай працы з беларускімі дэмакратычнымі структурамі і дапаможа трымаць беларускае пытанне на палітычным парадку дня Германіі і ЕС”.

Палітыкі, як заяўляецца, дамовіліся “працягваць супрацоўніцтва паміж Бундэстагам і інстытутамі дэмакратычных сіл Беларусі”.

Клёкнер запэўніла, што Бундэстаг “падтрымлівае і будзе падтрымліваць дэмакратычную Беларусь, беларускіх палітвязняў і грамадзянскую супольнасць, а таксама гатовы і надалей развіваць супрацоўніцтва з дэмакратычнымі інстытутамі”.

Ціханоўская прыбыла ў Германію з двухдзённым візітам увечары 25 лістапада. Раней паведамлялася, што асноўная мэта — абмеркаванне новага плана прэзідэнта ЗША Дональда Трампа па ўрэгуляванні сітуацыі ва Украіне і далейшых крокаў па Беларусі.

Чакаецца, што, акрамя Клёкнер, Ціханоўская сустрэнецца з кіраўніком знешнепалітычнага ведамства Германіі Ёханам Вадэфулем, дэпутацкай групай “Дэмакратычная Беларусь”, створанай у новым парламенце ФРГ, а таксама разам з Юліяй Навальнай (удава расійскага апазіцыйнага актывіста Аляксея Навальнага) атрымае прэмію “Людзі ў Еўропе” за 2025 год.