Літва можа звярнуцца ў Міжнародны суд ААН з-за перашкод грамадзянскай авіяцыі
27 лістапада, Позірк. Міністэрства юстыцыі, транспарту і камунікацый і замежных спраў Літвы будуць займацца зборам інфармацыі і прапрацоўваць магчымасць звароту ў Міжнародны суд ААН з-за шкоды і пагроз грамадзянскай авіяцыі ў сувязі з залётам кантрабандных паветраных шароў з тэрыторыі Беларусі.
Пра гэта, паводле інфармацыі Літоўскай тэлерадыёкампаніі, заявіла 27 лістапада прэм’ер-міністр Літвы Інга Ругінене пасля пасяджэння Камісіі па нацыянальнай бяспецы.
Паводле яе слоў, Міністэрства транспарту і камунікацый ужо накіравала зварот у сувязі з перашкодамі палётам у Міжнародную арганізацыю грамадзянскай авіяцыі (ICAO).
Адначасова МЗС, паводле сцвярджэння Ругінене, працуе над дадатковым пакетам санкцый у дачыненні да Беларусі.
Прэм’ер таксама абвергла інфармацыю, якая распаўсюджваецца перавозчыкамі, што ў Беларусі затрымалася каля 5 тыс. літоўскіх грузавікоў. Спаслаўшыся на інфармацыю неназваных службаў, яна заявіла, што гаворка ідзе толькі пра прыкладна 280 машын.
“Неабходна разумець, што кампаніі, якія дэкларуюць гэтыя грузавікі, належаць як беларускаму, так і літоўскаму капіталу. І гэтая колькасць адрозніваецца ад той, пра якую мы казалі раней. Пра 5 тыс. нават гаворкі не ідзе, таму што фізічна такой колькасці быць не можа“, — патлумачыла прэм’ер-міністр.
Паводле інфармацыі Lietuvos Rytas, прэм’ер-міністр таксама паведаміла, што “сумесна з Дэпартаментам мытні знойдзена рашэнне, якое дазволіць літоўскім кампаніям забраць паўпрычэпы грузавікоў, якія засталіся ў Беларусі, і такім чынам паменшыць страты”. Аднак, паводле слоў Ругінене, хоць вяртанне паўпрычэпаў становіцца магчымым, самі цягачы беларускія ўлады па-ранейшаму не выпускаюць.
Як адзначыла кіраўнік урада, на пасяджэнні камісіі таксама гаворка ішла аб падрыхтоўцы да новых магчымых пагроз.
“Для гэтага мы як Літва павінны быць асабліва гатовымі. Найперш Міністэрства абароны разам з войскам павінна падрыхтаваць стратэгічны план, які прадставіць мне праз тыдзень. У ім павінны быць расстаўленыя прыярытэты — што і як, на думку міністэрства, трэба рабіць тут і цяпер, рэагуючы на пагрозы, якія пастаянна растуць. Супрацьпаветраная абарона з’яўляецца адным з найважнейшых прыярытэтаў, і, верагодна, тое, што мы планавалі пяць гадоў таму ці раней, павінна быць перагледжана“, — сказала Ругінене.
Паводле яе слоў, на наступным тыдні Міністэрства эканомікі і інавацый прадставіць вынікі конкурсу, у якім 35 удзельнікаў прапаноўвалі ідэі з нагоды кантрабандных шароў. Ругінене адзначыла, што шэсць прадстаўленых прапаноў “выглядаюць цалкам рэальнымі і цікавымі“.
З заяваў Ругінэне незразумела, ці разглядалася на пасяджэнні Камісіі па нацыянальнай бяспецы магчымасць паўторнага закрыцця Літвой мяжы з Беларуссю ў сувязі з працягам прылёту метэазондаў з кантрабанднымі тытунёвымі вырабамі.
Напярэдадні пасяджэння Ругінене заяўляла, што ў той час, як Літве ўсё яшчэ пагражаюць запушчаныя з Беларусі метэазонды, Латвія і Польшча гатовыя пры неабходнасці абмеркаваць скаардынаванае закрыццё сваіх межаў з Беларуссю.
У канцы кастрычніка Вільнюс закрыў пункты пропуску Мядзінінкай (з беларускага боку — Каменны Лог) і Шальчынінкай (Беняконі), дамагаючыся такім чынам рэакцыі Мінска на масавы прылёт з Беларусі паветраных шароў з кантрабандай, якія перашкаджалі ў тым ліку грамадзянскай авіяцыі Літвы.
Памежныя пераходы аднавілі працу апоўначы 20 лістапада (а 1:00 паводле мінскага часу). За тры тыдні, пакуль яны былі зачыненыя, рэжым Лукашэнкі паспеў зрабіць больш жорсткімі правілы знаходжання ў краіне літоўскага грузавога транспарту, увязаўшы іх з працай пунктаў пропуску. У Беларусі затрымалася каля 1,3 тыс. зарэгістраваных у Літве грузавікоў, якія не могуць выехаць з краіны нават пры адкрытай мяжы.
Пры гэтым Мінск настойвае, што далейшыя перамовы з Вільнюсам па гэтым пытанні павінны весціся на палітычным узроўні, Літва (прынамсі публічна) спрабуе пазбегнуць гэтага, якая будзе, на яе думку, азначаць легітымізацыю беларускага рэжыму.
Пасля аднаўлення працы пераходаў Літва ўжо тройчы прыпыняла працу аэрапорта ў Вільнюсе праз новыя метэазонды, якія ўрываліся ў паветраную прастору краіны з тэрыторыі Беларусі.
