Стан Мілінкевіча стабільны, яго ўвялі ў медыкаментозны сон

28 лістапада, Позірк. Пазаштатны дарадца дэмакратычнага лідара Святланы Ціханоўскай, канцлер Вольнага беларускага ўніверсітэта Аляксандр Мілінкевіч па-ранейшаму знаходзіцца ў аддзяленні рэанімацыі, яго ўвялі ў медыкаментозны сон, паведаміла жонка грамадска-палітычнага дзеяча Іна Кулей на сваёй старонцы ў “Фэйсбуку”.

Паводле яе слоў, стан Мілінкевіча стабільны.

“Вельмі радуе, што для блізкіх людзей існуюць гадзіны наведвання. Таму можна яго бачыць, кранаць, размаўляць. Я расказала Аляксандру пра вялікую колькасць сяброў, якія падтрымліваюць яго і чакаюць акрыяння”, — напісала Кулей.

25 лістапада Кулей паведаміла, што стан Мілінкевіча вельмі цяжкі пасля аперацыі па стэнтаванні соннай артэрыі. Дзе праведзеная аперацыя і ў якой бальніцы ён знаходзіцца, не ўдакладнялася.

78-гадовы Мілінкевіч — беларускі грамадскі і палітычны дзеяч, кандыдат у прэзідэнты Беларусі на выбарах 2006 года. Кандыдат фізіка-матэматычных навук.

У 2006-м уганараваны прэміяй імя Сахарава.

У вясковым доме Мілінкевіча ў Гродзенскай вобласці ў снежні 2023 года адбыўся вобшук.