Ціханоўская заклікала свет узмацніць падтрымку дэмсіл Беларусі і М’янмы

29 лістапада, Позірк. Візіт Аляксандра Лукашэнкі ў М’янму і яго перамовы з в.а. прэзідэнта, старшынёй Камісіі нацыянальнай бяспекі і міру Мін Аун Хлайнам — гэта “не дыпламатыя, а сустрэча двух ізаляваных дыктатараў, якіх падтрымлівае [прэзідэнт Расіі Уладзімір] Пуцін”, заявіла беларускі дэмакратычны лідар Святлана Ціханоўская.

“Абодва рэжымы трымаюцца на гвалце, страху і хлусні. Яны не прадстаўляюць ні Беларусь, ані М’янму, — напісала палітык на сваёй старонцы ў сацыяльнай сетцы Х. — Пакуль тыраны дапамагаюць адзін аднаму грашыма, зброяй і тэхналогіямі, дэмакратычны свет павінен узмацніць падтрымку беларускіх дэмакратычных сіл і Урада нацыянальнага адзінства М’янмы. Беларусь і М’янма салідарныя, аб’яднаныя супраць дыктатуры”.

Лукашэнка наведваў М’янму 27–28 лістапада. Па выніках перамоваў з в.а. прэзідэнта ён пералічыў прыярытэтныя напрамкі супрацы: “Гэта фармацэўтыка, прамысловасць, перш за ўсё, наша тэхніка і тэхналогіі, навука, адукацыя, вайскова-прамысловы комплекс”. Беларусь і М’янма таксама ўзаемна скасавалі візавы рэжым (тычыцца непрацяглага знаходжання — да 30 дзён запар; да 90 дзён на працягу каляндарнага года).

14 ліпеня Лукашэнка падпісаў закон аб ратыфікацыі пагаднення паміж Беларуссю і М’янмай аб узаемнай абароне сакрэтнай інфармацыі. 7 сакавіка ў Мінску на перамовах з Мін Аун Хлайнам (тады палітыка прадстаўлялі як старшыню Дзяржаўнага адміністрацыйнага савета, прэм’ер-міністра М’янмы) ён вітаў рашэнне краіны падвысіць узровень дыпламатычнага прадстаўніцтва ў Беларусі.

У сакавіку М’янму наведваў кіраўнік Мінабароны Віктар Хрэнін.

10 студзеня паведамлялася, што на перамовах у Найп’іда Рыжанкоў і намеснік прэм’ера — саюзны міністр замежных спраў М’янмы Тан Свэ “канстатавалі падобныя пазіцыі ў шэрагу міжнародных пытанняў”.

2 лютага 2021 года ў М’янме пад кіраўніцтвам галоўнакамандуючага ўзброенымі сіламі старэйшага генерала Мін Аун Хлайна быў здзейснены ваенны пераварот, які выклікаў масавыя пратэсты, што перараслі ў грамадзянскую вайну. Паводле ацэнак арганізацыі ACLED (Аrmed Conflict Location & Event Data) на чэрвень 2022 года, у выніку гвалту пасля перавароту агулам было забіта каля 21 тыс. чалавек.

Урад нацыянальнага адзінства М’янмы — гэта ценявы прадэмакратычны грамадзянскі ўрад краіны, які лічыць лідара ваеннай хунты Мін Аун Хлайна ўзурпатарам, мае падтрымку з боку шэрагу асобных дзяржаў. Той у сваю чаргу абвясціў згаданую структуру “тэрарыстычнай”.