У аўтааварыі пад Лідай загінула 83-гадовая жанчына, сярод шпіталізаваных — 13-гадовае дзіця

30 лістапада, Позірк. Аб смяротным дарожна-транспартным здарэнні ў Лідскім раёне паведамляе Дзяржаўтаінспекцыя Гродзенскага аблвыканкама.

ДТЗ здарылася 29 лістапада ў 22:36. “60-гадовы кіроўца “Рэно” рухаўся з боку вёскі Палубнікі ў кірунку вёскі Горні, не даў перавагу для руху аўтамабілю “Аўдзі” пад кіраваннем 35-гадовага кіроўцы, які рухаўся па аўтадарозе М-6 з боку Мінска ў кірунку Гродна, і дапусціў з ім сутыкненне”, — гаворыцца ў паведамленні.

У выніку ДТЗ кіроўца аўтамабіля “Рэно” са шматлікімі траўмамі быў дастаўлены ў бальніцу, а яго 83-гадовая пасажырка памерла на месцы аварыі, адзначае ДАІ.

“Кіроўца аўтамабіля “Аўдзі” і яго 13-гадовы пасажыр атрымалі раненні рознай ступені цяжкасці і былі шпіталізаваныя ў бальніцу”, — паведамляе Дзяржаўтаінспекцыя.

Узбуджана крымінальная справа.

Як раней паведамляў Следчы камітэт, у першым паўгоддзі гэтага года ў Беларусі зафіксавана зніжэнне колькасці дарожна-транспартных здарэнняў і пацярпелых у іх людзей, аднак павялічылася колькасць загінулых. Значны рост колькасці ДТЗ назіраецца ў Гомельскай вобласці, загінулых — у Мінску, а параненых — у Мінскай вобласці. Дакладныя лічбы не называліся.

Начальнік галоўнага ўпраўлення ДАІ МУС Віктар Ротчанкаў 21 кастрычніка паведаміў, што ў 2024 годзе ў ДТЗ у Беларусі загінулі 434 чалавекі.